Bruna yfir há­lendið á buggy-bíl: „Þetta er með því skemmti­legasta sem ég hef gert“

Keppendur verða undir sunnanverðum Langjökli í dag, auk þess að heimsækja Heklu. Á laugardag og sunnudag verður rallað kringum Eyjafjalla- og Mýrdalsjökla áður en komið er í endamark á Hótel Kötlu við Vík í Mýrdal.

Kappaksturinn gengur þannig fyrir sig að ekið er í tveimur hlutum hvern dag og bílar færðir milli staða í millitíðinni. Tíminn er mældur og keppendur fá að nýta forskotið sem þeir vinna sér inn og leggja fyrr af stað en næsti maður á eftir.

Allt saman hófst þetta í gær á keppnissvæði Kvartmíluklúbbsins, þar sem eknar voru tvær stuttar sérleiðir til að ákveða niðurröðun fyrir ræsingu í dag.

Sigurvegari keppninnar í fyrra er fyrrum atvinnuökumaðurinn Kristján Einar Kristjánsson, sem keppti meðal annars í Formúlu 3 og starfar í dag sem sérfræðingur Vodafone Sport í Formúlu 1 og heldur úti hlaðvarpinu Pitturinn.

„Ég væri að ljúga ef ég segði að það væri ekki kominn smá fiðringur, pínu stress alltaf fyrir keppni en þetta er með því skemmtilegasta sem ég hef gert þannig að ég hef engar áhyggjur,“ sagði Kristján þegar hann mætti á keppnisstað í gær.

„Við mætum í keppni til þess að sigra en þetta er langt og erfitt rallý, við stefnum fyrst og fremst á að keyra alla kílómetrana og komast í mark, en auðvitað reynum við að keyra eins þétt og við getum. Við ætlum ekki að gefa neitt eftir,“ sagði aðstoðarökumaður hans, Guðni Freyr Ómarsson, fjórfaldur Íslandsmeistari í rallakstri. 

Gjörsamlega galin græja

Þeir félagar keppa fyrir BRP-Ellingsen og eru á kraftmeiri Can-Am bíl, tveggja sæta í stað fjögurra, en þeir keyrðu þegar keppnin vannst í fyrra. Myndskeið innan úr bílnum má sjá hér fyrir neðan. 

„Þetta er galið skemmtileg græja, en það sem er svo magnað við þetta rall, hann er bara úr umboðinu, nýr og óbreyttur að eiginlega öllu leyti. Við förum bara af stað þannig, þessi keppni er svo falleg með það að gera að það er hægt að taka þátt í henni án þess að vera djúpt í öllu. En græjan er náttúrulega gjörsamlega galin, nokkrar sekúndur í hundrað og fjöðrunin étur hvað sem er. Gaman að vera komin á tveggja manna bíl sem er hraðari og þá erum við með færri afsakanir ef þetta klúðrast hjá okkur um helgina,“ sagði Kristján léttur í lund að lokum.

Allar helstu upplýsingar um Can-Am Hill Rally má finna á heimasíðunni. Úrslitum má fylgjast með hér. 

Keppnin verður svo í beinni útsendingu alla helgina á YouTube rás Kappaksturs. Streymi af undanrásunum í gær má sjá hér fyrir neðan.