Býðst að snúa aftur í NFL eftir út­legð

Kaepernick hefur ekki spilað í NFL-deildinni síðan 2016, þá aðeins 29 ára gamall, sem greinendur vestanhafs segja af pólitískum ástæðum. Kaepernick var leikmaður San Francisco 49ers og meðal betri leikstjórnenda í deildinni þegar hann var leystur undan samningi eftir að hafa sent ítrekað pólitísk skilaboð tengd kynþáttahatri á leikjum.

Kaepernick er í dag 36 ára og hefur lýst yfir áhuga á að koma aftur inn í deildina sem leikmaður, þrátt fyrir að hafa ekki spilað í um átta ár. Hann vilji jafnvel taka þátt með bandaríska landsliðinu þegar verður leikið í amerískum fótbolta í fyrsta skipti á Ólympíuleikunum eftir fjögur ár.

Ekki hefur heyrst af leikmannasamningum á borði Kaepernick en fyrrum þjálfari hans hjá 49ers, Jim Harbaugh, hefur boðið honum starf í þjálfarateymi sínu.

Harbaugh tók í vetur við liði Los Angeles Chargers og greindi frá því í vikunni að hann hefði boðið Kaepernick að koma inn í þjálfarateymi sitt.

„Ef það væri einhvern tíma leið sem hann vildi fara held ég að hann yrði frábær þjálfari,“ segir Harbaugh við USA Today. „Við ræddum þetta aðeins og hann er að hugsa málið. Hann ætlaði að vera í sambandi en ég hef ekki heyrt frá honum frekar. Þetta var snemmárs,“ segir Harbaugh.

Hvað gerðist hjá Kaepernick?

Kaepernick var leikstjórnandi liðs San Francisco 49ers á árunum 2011 til 2016 og þótti á meðal betri leikstjórnanda í NFL-deildinni. Það vakti heimsathygli þegar hann ákvað að sitja, í stað þess að standa líkt og hefð er fyrir, á meðan þjóðsöngur Bandaríkjanna var leikinn fyrir æfingaleik fyrir leiktíðina 2016.

Hann kraup þá á kné það sem eftir lifði leiktíðar á meðan þjóðsöngurinn var leikinn, og vildi með því mótmæla kynþáttamismunun, ofbeldi lögreglu og kúgun minnihlutahópa í bandarísku samfélagi.

Leiktíðin 2016 var ekki sú besta hjá Kaepernick sökum meiðsla en hann var að henni lokinni látinn fara frá liði San Francisco. Mótmæli hans ollu skautun í bandarísku samfélagi þar sem fólk skiptist í tvær fylkingar.

Donald Trump, þáverandi Bandaríkjaforseti, var á meðal þeirra sem sagði að reka ætti alla þá leikmenn sem dirfðust að mótmæla á meðan þjóðsöng Bandaríkjanna stæði.

Kaepernick hefur ekki fundið leið inn í NFL-deildina síðan 49ers leysti hann undan samningi og var raunar gerður útlægur. Morgunljóst þykir að fjölmörg félög hefðu getað fundið not fyrir öflugan leikstjórnanda á besta aldri en fjölmargir greinendur vestanhafs segja ástæðu þess að hann hefur ekki fengið að spila síðan vera pólitíska.