Engin endur­talning í Kraganum

Þetta kemur fram í svarbréfi yfirkjörstjórnarinnar til umboðsmanna Framsóknarflokks. Umboðsmaður Framsóknarflokksins í Suðvesturkjördæmi lagði fram beiðni daginn eftir Alþingiskosningar um að talið yrði upp á nýtt í kjördæminu. Þegar lokatölur úr kjördæminu bárust í hádeginu á sunnudag datt oddviti flokksins, Willum Þór Þórsson, úr jöfnunarþingsæti og formaður flokksins Sigurður Ingi Jóhannsson fór inn í hans stað.

Fram kom í fréttum í gær að úthlutun þingsæta í kjördæminu sem fara átti fram í dag hefði verið frestað vegna þess að enn ætti eftir að úrskurða um sautján ágreiningsatkvæði. Engar upplýsingar komu þó fram um hvort af endurtalningu í kjördæminu yrði.

Fóru í saumana á talningunni

Í svarbréfinu segir að yfirkjörstjórnin hafi síðustu daga, í kjölfar beiðni um endurtalningu, tekið sér tíma til að fara ofan í saumana á framkvæmd nýafstaðinna alþingiskosninga og sannreynt niðurstöður talningar, meðal annars með því að fara yfir allar færslur í gerðabókum sveitarfélaga kjördæmisins vegna kosninganna.

Niðurstaða þeirrar skoðunar hafi sem áður segir verið að engin þörf væri talin á endurtalningu.

Fara yfir hlutverkið

Þá segir í svarbréfinu að meginhlutverk yfirkjörstjórna kjördæma sé framkvæmd og yfirumsjón talningar í hverju kjördæmi fyrir sig. Í því felist meðal annars ábyrgð á því að lögum og reglum, þar á meðal reglugerð um talningu atkvæða nr. 447/2024, sé fylgt. Markmið þeirrar reglugerðar sé að tryggja að atkvæði í kosningum séu talin með nákvæmum, öruggum og rekjanlegum hætti í samræmi við ákvæði kosningalaga. Í nýafstöðnum kosningum hafi talning atkvæða farið fram í samræmi við þær samræmdu, nákvæmu og skýru reglur sem finna má í reglugerðinni.

Í reglugerðinni sé að finna ítarlegar reglur um framkvæmd talningar og þeirra á meðal séu ákvæði um tvíflokkun atkvæða og tvítalningu. Tryggt sé að umboðsmenn allra framboða séu viðstaddir talningu atkvæða og að þeir geti fylgst með því að rétt sé staðið að framkvæmdinni. Þá beri að taka stikkprufur til þess að ganga úr skugga um að talningin sé rétt. Að talningu lokinni sé fjöldi talinna atkvæða stemmdur af við fjölda greiddra atkvæða samkvæmt upplýsingum frá kjörstjórnum sveitarfélaganna í kjördæminu. Einungis þegar tryggt hefur verið að öllum ákvæðum laga og reglugerða um framkvæmd talningar hafi verið fylgt staðfesti yfirkjörstjórn niðurstöður talninga við Landskjörstjórn.

Fréttin hefur verið uppfærð.