Þakið ætlaði að rifna af Ally Pally eftir níu pílna leik Heta

Heta náði níu pílna leiknum í þriðja legg í öðru setti viðureignarinnar gegn Woodhouse. Í fyrstu tveimur heimsóknum sínum henti hann í 180. Í þriðju heimsókninni tók hann svo út 141.

Þakið ætlaði hreinlega að rifna af Alexandra höllinni þegar níunda og síðasta píla Hetas endaði í tvöföldum tólf.

Ástralinn fagnaði sem óður maður en Woodhouse var ekki síður glaður og samfagnaði kollega sínum eins og sjá má á myndbandinu af níu pílna leiknum hér fyrir neðan.

Þetta er annar níu pílna leikurinn á HM. Hollendingurinn Christian Kist náði því einnig í viðureign sinni gegn Madars Razma í 1. umferð. Hann tapaði reyndar viðureigninni.

Keppendur sem ná níu pílna leik á HM fá sextíu þúsund pund, eða rúmlega tíu og hálfa milljón íslenskra króna. Sama upphæð fer til góðgerðasamtaka og eins heppins áhorfanda í Ally Pally.

Viðureign Heta og Woodhouse stendur nú yfir. Staðan er 1-1 eftir tvö sett. Fylgjast má með leiknum í beinni útsendingu á Vodafone Sport.