„Kemur pabba mínum ekki við hvar ég spila fót­bolta“

Gylfi fer yfir stormasöm vistaskipti sín í viðtali við 433.is í dag þar sem hann er meðal annars spurður út í viðtal Vísis við Styrmi Þór Bragason, varaformann knattspyrnudeildar Vals.

Valur samþykkti tilboð frá bæði Víkingi og Breiðabliki í Gylfa en af orðum Styrmis að dæma var það ekki ákvörðun Gylfa sjálfs að hann færi til Víkings í stað Breiðabliks. „Ég er ekki endilega að segja að það hafi verið ákvörðun Gylfa hvort að hann endaði hjá Breiðabliki eða ekki. Það er að minnsta kosti ekki ákvörðun hans eins heldur er það líka Breiðabliks sjálfs að ákveða hvort það semji við leikmanninn. Ég held að menn megi ekki lesa of mikið í endanlega niðurstöðu þar,“ sagði Styrmir meðal annars.

„Ég veit ekki til þess að ég hafi rætt við Styrmi þegar ég tók ákvörðunina, ég er 35 ára gamall og geri það sem mig langar til. Ég veit ekki hvort hann eigi við að faðir minn eða annar hafi tekið ákvörðun um hvar ég spila fótbolta,“ sagði Gylfi við 433.is og bætti við:

„Ég veit ekki alveg hvað hann meinar, kannski hans tilfinning. Hingað til hef ég ráðið ferðinni á mínum ferli og ég valdi Víking af því að mig langaði þangað. Það kemur pabba mínum ekki við hvar ég spila fótbolta.“

Lagði sig ekki allan fram gegn ÍA

Valsmenn voru afar óánægðir með frammistöðu Gylfa í leiknum við ÍA á laugardag, í Lengjubikarnum, og sjálfur viðurkennir Gylfi að hafa þar ekki lagt sig hundrað prósent fram. Hann vildi fara frá Val og segist hafa verið búinn að tjá Valsmönnum það 4. febrúar að hann vildi fara frá félaginu. Það að reyna ekki á sig gegn ÍA virðist því hafa verið örþrifaráð til að knýja fram vistaskiptin.

„Ég hef reynt að leggja mig 100 prósent á hverri einustu æfingu og hverjum einasta leik, þangað til kannski á móti ÍA. Þar var þetta komið í algjör leiðindi, ég veit það alveg sjálfur að eftir á að hyggja hefði ég átt að tækla þetta öðruvísi,“ segir Gylfi.

„Þetta var orðið mjög súrt, komið í rangan farveg. Ég hefði átt að gera hlutina öðruvísi, þetta var bara ákvörðun sem ég tók og þetta endaði eins og þetta endaði. Auðvelda ákvörðunin hefði verið að vera áfram í Val og ekki rugga bátnum og fara í gegnum þetta allt sem hefur verið í gangi síðustu daga, ég var tilbúin að gera það. Ég held að ég geti haldið áfram að bæta mig og komast í betra standi,“ segir Gylfi sem vill meina að endir hans hjá Val hefði aldrei þurft að verða með þeim leiðindum sem nú hafa orðið.

„Það er fullt af hlutum sem ég vil ekki fara út í, þetta er búið. Það er leiðinlegt hvernig þetta endaði, þetta hefði átt að fara öðruvísi. Ég og þeir held ég að myndum gera þetta öðruvísi,“ segir Gylfi.