„Hver stendur í vegi fyrir því? Ríkis­stjórn Krist­rúnar Frostadóttur“

„Það er nákvæmlega þetta sem vinstri menn hræðist, fullur salur af kraftmiklu fólki sem hefur trú á Sjálfstæðisstefnunni,“ hóf Áslaug ræðu sína á. 

„Verkefni okkar er skýrt, við eigum að tala skýrar fyrir Sjálfstæðisstefnunni, vera óhrædd og stolt í að sýna Sjálfstæðisstefnuna í verki. Þannig verður Sjálfstæðisflokkurinn aftur stór, þannig náum við árangri fyrir Ísland,“ sagði hún.

Hún skautaði ekkert fram hjá niðurstöðum nýjustu Alþingiskosninga og sagði fylgið í sögulegu lágmarki þar sem að kjósendur hefðu ekki næga trú á flokknum. Ekki væri hægt að kenna neinum um en þeim sjálfum en þá væri það líka í þeirra höndum að laga stöðuna.

Margt ríkisstjórn Kristrúnar Frostadóttur að kenna

„Við vitum að sterkara efnahagslíf hvílir á öflugum atvinnurekstri,“ sagði Áslaug.

Þá var ýmislegt annað sem hún taldi Sjálfstæðismenn vita og vilja gera, svo sem að verðlauna dugnað.

„Við verðlaunum dugnað, hver stendur í vegi fyrir því? Jú ríkisstjórn Kristrúnar Frostadóttur sem ætlar ekki bara að hækka skatta heldur líka handvelja hvaða atvinnugreinar fá að blómstra og hverjar ekki. Við vitum að hér eru einstök tækifæri til að ýta undir hagvöxt, varðveita sjálfstæði okkar og einfalda regluverk. Hver stendur í vegi fyrir því? Jú ríkisstjórn Kristrúnar Frostadóttur sem ætlar að beita brögðum til að koma okkur hratt inn Evrópusamband þar sem hagvöxtur er sagnfræðilegt hugtak,“ segir hún.

„Það kemur á daginn að planið var að fórna fullveldi okkar, auðlindum og sjálfstæði með inngöngu í Evrópusambandið og við höfnum slíkum hugmyndum.“

Þá sé það einnig ríkisstjórn Kristrúnar Frostadóttur, ásamt flokki hennar í borgarstjórn, að kenna að ungt fólk fái ekki húsnæði né græn svæði. Ríkisstjórnin komi þá einnig í veg fyrir öflugri heilbrigðisþjónustu eldri borgara, skilvirkari aðferðir í málefni hælisleitenda og betra menntakerfi í grunnskólum landsins.

„Ég er viss um að þessi ríkisstjórn standi nú þegar á öndinni og ég efast að eitthvert þeirra kunni að beita Heimlich aðferðinni,“ segir Áslaug sem bjargaði kafnandi konu á Kastrup veitingastaðnum með Heimlich aðferðinni í desember.

„Við stjórnarflokkanna sem emja undan því að við veitum þeim eðlilegt aðhald segi ég, afsakið það sem þið hafið nú þegar kynnst eru hveitibrauðsdagarnir, við erum rétt að byrja.“

Þurfi að snúa bökum saman

Áslaug Arna lagði líka áherslu á sameiningu innan flokksins og mikilvægi þessi að tala fyrir stefnu hans.

„Tímabili dýrkeyptra málamiðlana við vinstri flokkana er lokið,“ sagði hún og hlaut standandi lófaklapp frá landsfundargestum.

Hún segir vandamál að fólki þori ekki að viðurkenna að þau styðji flokkinn en hún hafi samt trú á að hægt sé að auka fylgi Sjálfstæðisflokksins.

„Verkefnið núna er að virkja og sameina flokksmenn alla og færa starfið inn í nútímann,“ sagði Áslaug.

Flokksmenn þurfi að snúa saman bökum og þétta raðirnar. Þá hafi flokknum alltaf gengið vel þegar hann nær til ungs fólks.

„Sjálfstæðisflokkurinn hefur sýnt það að það hefur verið farsælt þegar hann treystir ungu fólki,“ segir hún.

Að lokum segist hún tilbúin að leggja allt undir og hvetur flokksmenn að fresta ekki framtíðinni.

Hlusta má á ræðuna í heild sinni í spilaranum hér fyrir neðan.