Almar Orri til Miami há­skólans

Almar ætlar að spila með Miami University næsta vetur. Almar hefur verið í tvö ár í Bradley University en skiptir nú yfir til Miami.

Miami University er þó ekki frá Miami í Flórída eins og einhver gæti haldið heldur er hann í háskólabænum Oxford í Ohio fylki. Bradley University er í Peoria í Illinois fylki og Almar fer því ekki mjög langt.

Almar hefur verið einn efnilegasti körfuboltamaður landsins síðustu ár og lykilmaður í unglingalandsliðum. Hann er uppalinn í KR.

Í úrslitakeppni Eurobasket hjá tuttugu ára landsliðum í fyrra þá var Almar með 16,1 stig, 5,0 fráköst og 2,3 stoðsendingar að meðaltali í leik.

„Við erum ánægðir með að fá Almar inn í Miami fjölskylduna. Hann passar frábærlega inn í allt hjá okkur, námslega, félagslega og körfuboltalega. Hann er kemur með mikla fjölhæfni og hæfileika inn í okkar lið,“ sagði Travis Steele, þjálfari Miami í frétt um komu Almars á heimasíðu skólans.

Almar var með 5,7 stig og 2,0 fráköst á 18,4 mínútum í leik á öðru ári sínu með Bradley en skoraði mest 28 stig í einum leik. Liðið vann 28 af 37 leikjum sínum.

„Við teljum að við getum nýtt vel hans hæfileika í okkar sóknarleik. Almar er að koma frá Bradley sem er var lið í hæsta gæðaflokki og lið sem þekkir það að vinna. Við metum mikils leikmenn sem vita hvað þarf til að vinna,“ sagði Steele.