Sér fram á bjarta framtíð fyrir börnin þökk sé styrknum

Sólrún Dögg Jósefsdóttir skrifar 2. maí 2025 18:51

Menntunarsjóður Mæðrastyrksnefndar Reykjavíkur kom saman á Bessastöðum þar sem forseti Íslands fékk afhent kerti til styrktar sjóðnum. Halla Tómasdóttir forseti Íslands, Marly Gomes styrkþegi og Guðríður Sigurðardóttir formaður menntunarsjóðsins. Vísir/Anton Brink

Einstæð móðir í fasteignasölunámi sér fram á fjárhagslegt öryggi í framtíðinni þökk sé styrks úr menntunarsjóði Mæðrastyrksnefndar Reykjavíkur.

Sjóðurinn styrkir tekjulágar konur, oft einstæðar mæður mæður, til menntunar, svo að þær eigi betri möguleika á góðu framtíðarstarfi. Til Mæðrastyrksnefndar Reykjavíkur leitar fjöldi hæfileikaríkra kvenna vegna bágs efnahags, en gætu átt kost á betri lífskjörum ef þær fengju stuðning til að afla sér menntunar. Undanfarin ár hefur sjóðurinn veitt 465 styrki.

Nám alls ekki ókeypis

Styrkþegum er veittur styrkur út námsferilinn svo lengi sem þær sýna fram á námsárangur að skólaári loknu.

Einn styrkþeganna er Marly Gomes, einstæð móðir sem stundar nám til löggildingar fasteignasala. Slíkt nám er kostnaðarsamt, en á vef Endurmenntunar HÍ stendur til að mynda að námið kosti tæplega 1,9 milljón króna.

„Þær styrkja okkur um skólagjöldin og kaupa bækur og allt sem þarf. Svo lengi sem þú ert að sýna fram á námsárangur þá halda þær áfram að styrkja þig.“ útskýrir Marly í samtali við fréttastofu.

„Ég hef líka fengið aukahjálp, matarúthlutun og ef það er eitthvað sem krakkarnir þurfa þá hef ég fengið aðstoð með það frá Mæðrastyrksnefnd. Þær halda mjög vel utan um einstæðar mæður.“

Breytir lífum margra

Marly er hálfnuð með námið, sem telur tvö ár, og segir að án styrksins hefði hún ekki efni á því.

„Það væri að sjálfsögðu annars miklu erfiðara að fara í þetta nám. Þess vegna er ég mjög þakklát fyrir að fólk styrki okkur til þess að við einstæðir foreldrar fáum tækifæri til að fara í nám sem okkur langar í en höfum ekki beinlínis efni á að borga sjálf. Þannig að mér finnst þetta skipta sköpum.“

Fulltrúar Menntunarsjóðs Mæðrastyrksnefndar afhentu Höllu Tómasdóttur forseta Íslands kerti til styrktar málefninu þegar fjáröflun ársins var hleypt af stokkunum við hátíðlega athöfn á Bessastöðum í dag. Marly var meðal viðstaddra.

Gestalistinn bauð upp á sannkallaða kvennaveislu. Vísir/Anton Brink

„Þetta var æðislega gaman að hitta Höllu, hún er svo jarðbundin og góð manneskja. Hún var ekkert að setja sig á háan stall heldur er kona fólksins.“

Hún þakkar þeim sem hafa lagt sitt af mörkum til söfnunarinnar.

„Þetta breytir lífi svo margra kvenna sem vilja fara í skóla en sjá ekki fram á það, en með hjálp Mæðrastyrksnefndar hafa þær látið drauma sína rætast. Og aukið lífsgæði sín og barnanna sinna, sem er svo mikilvægur hluti af lífinu.“

Hún sér fyrir sér að geta staðið á eigin fótum og verið fjárhagslega örugg að námi loknu.

„Að ég verð ekki lengur bara, hvernig get ég reddað mér? Heldur fjárhagslega örugg. Það skiptir miklum sköpum.“