Njarð­vík og ÍR upp í efstu sætin í Lengjudeildinni

Njarðvík og ÍR eru bæði með ellefu stig eða stigi meira en Þór og Þróttur sem eru í næstu sætum. Bæði Njarðvík og ÍR hafa enn ekki tapað deildarleik á tímabilinu.

Njarðvík vann 4-0 útisigur á Selfossi. Oumar Diouck skoraði tvö mörk fyrir Njarðvík en þeir Amin Cosic og Dominik Radic eitt hvor.

ÍR vann 3-0 útisigur á Fjölni í Grafarvogi. Arnór Sölvi Harðarson, Sigurður Karl Gunnarsson og Renato Punyed Dubon skoruðu mörk ÍR-liðsins.

Þórsarar frá Akureyri eru í þriðja sætinu eftir 4-1 sigur á Fylki. Clement Bayiha, Ibrahima Balde, Sverrir Páll Ingason og Sigfús Fannar Gunnarsson skoruðu mörk Þórsliðsins en Tumi Fannar Gunnarsson jafnaði metin í 1-1.

Keflvíkingar duttu niður í fimmta sætið eftir að HK mætti í Reykjanesbæinn og vann 3-0 sigur. HK er stigi á eftir Keflavík í sjötta sætinu.

Jóhann Þór Arnarsson skoraði fyrstu tvö mörk Kópavogsliðsins á fyrstu tuttugu mínútunum en fyrra markið hans kom úr vítaspyrnu á 15. mínútu en það seinna fjórum mínútum síðar.

Þriðja mark HK-manna skoraði síðan Tumi Þorvarsson í blálok leiksins. HK var aðeins búið að skora samtals fjögur mörk í fyrstu fjórum leikjum sínum fyrir leikinn í kvöld.

Grindavík vann 6-2 stórsigur á Leikni í Breiðholti. Útlitið er mjög svart hjá Leiknismönnum þessa dagana.

Breki Þór Hermannsson skoraði tvívegis í fyrri hálfleiknum og Adam Árni Róbertsson eitt. Í þeim seinni bætti Adam Árni við sínu öðru marki og þeir Kristófer Máni Pálsson og Sindri Þór Guðmundsson skoruðu líka.

Shkelzen Veseli og Dagur Gunnarsson minnkuðu muninn fyrir Leikni sem hefur enn ekki unnið leik og situr í botnsæti deildarinnar með eitt stig.