Leik­maður Barcelona fékk ný­fætt barn í fangið frá stuðnings­manni

Barcelona stjarnan Fermín López fór til stuðningsmanna til að gefa eiginhandaráritanir en þurfti að gera aðeins meira en það.

Einn af stuðningsmönnum var þarna mættur á svæðið með nýfætt barn sitt. Hann rétti López barnið og tók mynd af þeim saman.

López tók þessu vel og á samfélagsmiðlum voru menn fljótir að rifja upp heimsfræga myndatöku af Lionel Messi og þá nokkra mánaða gömlum Lamine Yamal.

Margir eru á því að þar hafi Messi fært eitthvað af töfrum sínum yfir á Yamal.

Yamal er aðeins sautján ára gamall en þegar orðin ein stærsta og öflugasta knattspyrnustjarna heims.

Fermín López er aðeins 22 ára gamall en var í flottu hlutverki hjá Barcelona. Hann var með átta mörk og tíu stoðsendingar á tímabilinu.

López hefur aftur á móti ekki fengið mörg tækifæri með spænska landsliðinu þótt að hann hafi verið í hópnum undanfarið ár.