Um­mæli Davíðs Smára ekki á borði aga­nefndar

Þetta segir í svari KSÍ við fyrirspurn Vísis í dag.

Málskotsnefnd KSÍ hefur, samkvæmt reglugerð um agamál, rétt til þess að skjóta málum til aga- og úrskurðarnefndar en hefur ekki gert það eftir ummæli Davíðs á sunnudaginn.

Davíð var vægast sagt ósáttur við frammistöðu Twana Khalid Ahmed og sagðist hreinlega með kvíðahnút í maganum fyrir hvern leik sem hann dæmdi.

„Ég bara spyr, hvað ætlum við að vera lengi í þessari vitleysu? Leik eftir leik er maður settur á leiki sem gerir stór mistök leik eftir leik. Ég er orðin gríðarlega þreyttur á þessu,“ sagði Davíð til að mynda og einnig:

„Ég er orðinn hundleiður á þessu. Maður er með hnút í maganum í hvert skipti sem ákveðinn aðili dæmir leiki. Ég fatta ekki alveg hvaða kvóta er verið að fylla í með að þetta sé svona.“

Sérfræðingarnir í Stúkunni á Stöð 2 Sport sýndu reiði Davíðs skilning, enda var löglegt mark tekið af Vestra í leiknum, en voru þó sammála um að hann hefði farið yfir strikið. 

„Þetta er strax eftir leik. Hann er mjög heitur, reiður, nýbúinn að sjá að það er búið að taka af þeim löglegt mark. Ef þú settir míkrafóninn fyrir framan hann núna þá fengir þú ekki þessa útgáfu af viðtali. Ég held að hann átti sig á því að þetta er ekki dómaranum að kenna. Það er ekki hann sem tekur ákvörðunina með þessa rangstöðu,“ sagði Lárus Orri Sigurðsson.

„Mér fannst hann fara yfir strikið. Ég skil hann en þetta er staða þar sem maður verður að reyna að hemja sig. Við höfum allir, sem höfum þjálfað, lent í því að nota stór orð eða að tilfinningarnar hafi hlaupið með okkur. Þetta er hluti af starfinu,“ sagði Ólafur Kristjánsson.