Sjúkra­þjálfarinn fær stöðu­hækkun hjá Þórsliðinu

Hjörtur mun aðstoða Lárus með Þórsliðið í Bónus deildinni á komandi tímabili.

Hjörtur þekkir mjög vel til liðsins en hann hefur starfað sem sjúkraþjálfari meistaraflokksliða Þórs og Hamars-Þórs og starfað við hlið Lárusar Jónssonar þjálfara.

Nú fær hann stöðuhækkun hjá Lárusi.

Móðir Hjartar er Jóhanna Margrét Hjartardóttir, formaður körfuknattleiksdeildar Þórs, og yngri bróðir hans er Baldur Ragnarsson sem gerði Stjörnuna að Íslandsmeisturum á dögunum.

Hjörtur er þekktur sem bæði leikmaður og þjálfari hjá Þór en hann er reynslumikill bæði innan vallar sem utan. Hann var einnig í yngri landsliðum KKÍ.

„Ég hlakka til áframhaldandi samstarfs á nýjum vettvangi,“ sagði Lárus Jónsson þjálfari við miðla Þórs og bætti við: „ Hjörtur á eftir að koma í þjálfarateymið með orku og metnað sem á eftir að nýtast vel,“ sagði Lárus.

Þórsarar enduðu í tíunda sæti í deildinni í vetur og misstu af úrslitakeppninni þrátt fyrir níu sigurleiki á leiktíðinni.