Evrópu­meistararnir rúlluðu yfir Messi og fé­laga

Messi var að eigin sögn nokkuð brattur eftir að Inter lagði Porto í riðlakeppninni og taldi að bandaríska liðið ætti að eiga í fullu tré við öll lið frá Evrópu. Annað kom þó á daginn í leiknum í dag en PSG komst í 4-0 í fyrri hálfleik meðan að Inter komst varla í sókn en liðið átti núll skot á mark í fyrri hálfleik.

Einhverjir reiknuðu jafnvel með að markatala PSG myndi enda í tveggja stafa tölu líkt og þegar Bayern lagði Auckland City 10-0 fyrr í keppninni en Inter varðist betur í seinni hálfleik og mörkin urðu ekki fleiri. Messi komst meira að segja sjálfur í ágætt færi en Donnarumma í marki PSG var vel á verði og varði sitt fyrsta skot í leiknum.

Lokatölur 4-0 og PSG því komið áfram í 8-liða úrslit þar sem liðið mætir sigurvegaranum úr leik Flamengo og Bayern en sú viðureign hefst klukkan 20:00 í kvöld.