Meiri­hluti vill banna sjókvíaeldi

Könnunin var gerð á vegum Gallup dagana 3. til 17. júlí og svöruðu 936 en könnunin var gerð fyrir Íslenska náttúruverndarsjóðinn. 13,5 prósent svarenda sögðust vera jákvæð gagnvart laxeldi í opnum sjókvíum og um 22 prósent ekki hafa skoðun á málinu. 64,1 prósent svarenda sögðust neikvæð gangvart sjókvíaeldi.

„Það er ánægjulegt að sjá hversu fast mótaðar skoðanir þjóðin hefur myndað sér á sjókvíaeldi í opnum netapokum. Þjóðin áttar sig mjög vel á því hversu skaðleg starfsemi þetta er fyrir lífríkið, umhverfið og eldisdýrin sjálf. Það er mjög ánægjulegt. Við erum komin miklu lengra Íslendingar almennt en aðrar þjóðir í vitundarvakningu um hversu skaðlegur þessi iðnaður er,“ segir Jón Kaldal, talsmaður Íslenska náttúruverndarsjóðsins.

Kjósendur Norðausturkjördæmis neikvæðastir

Lítill munur er á afstöðu fólks eftir kyni, menntunarstigi og aldri - þó fólk yfir sjötugu sé jákvæðast gagnvart eldinu. Nokkurn mun má greina milli kjósenda ákveðinna kjördæma. Jákvæðastir eru kjósendur Norðvesturkjördæmis, en þar er sjókvíaeldi stundað á nokkrum stöðum, sér í lagi á Vestfjörðum. Í kjördæminu segjast 33 prósent jakvæð en fjörutíu og níu prósent eru neikvæð. Tíu prósent kjósenda Norðausturkjördæmis líta jákvæðum augum á sjókvíaeldi en sextíu og sjö prósent eru mótfallin því.

„Það er ákaflega afgerandi þar og væntanlega vegna hugmynda sem hafa verið kynntar í vor um að koma sjókvíaeldi niður í Eyjafjörð, sem fólk er mjög ósammála.“

Breiður stuðningur við að koma skikk á iðnaðinn 

Þá eru kjósendur ríkisstjórnarflokkanna mjög mótfallnir eldinu, andstaðan mælsti milli 70 og 75 prósenta. Jákvæðastir eru kjósendur Sjálfstæðisflokks, en 35 prósent eru jákvæðir gagnvart eldinu, kjósendur Framsóknarflokks, þar sem 28 prósent eru jákvæð, og kjósendur Miðflokks, þar sem 29 prósent styðja eldið.

Sextíu prósent svarenda segjast vilja banna laxeldi í opnum sjókvíum en 20,7 prósent vilja leyfa eldið.

„Þetta er mjög sterkt ákall frá kjósendum allra flokka myndi ég segja því það er meira en sextíu prósent andstaða í öllum flokkum nema í Framsóknarflokki og Sjálfstæðisflokki. Samt eru fleiri neikvæðir fleiri í Framsóknarflokknum en jákvæðir gagnvart þessum iðnaði,“ segir Jón.

„Ríkisstjórnin hefur greinilega mjög breiðan og djúpan stuðning við það að koma skikki á þennan iðnað.“