Rok og rigning sama hvert er litið

Blíðviðri hefur leikið við landann víða í dag og spyrja sig eflaust margir hvort það boði fögur fyrirheit fyrir stærstu ferðahelgi Íslendinga sem gengur í garð á föstudaginn. Sigurður Þ. Ragnarsson, Siggi stormur veðurfræðingur, sat fyrir svörum í kvöldfréttum. 

Sigurður segir að fimmtudagurinn líti vel út. Föstudagurinn byrji sömuleiðis vel.

„Það er á leiðinni, þegar líður á föstudaginn, myndarleg lægð. Því miður er það svo að lægð með miklu vatnsveðri og töluverðum vindi sem gengur inn á landið um föstudagseftirmiðdag eða föstudagskvöld. Og á laugardeginum, aðaldeginum, þá er rok og rigning um mest allt land.“

Pollagallinn inngönguskilyrði í dalinn

Hann segir úrkomuna minni á Norðausturlandi á laugardag og á sunnudag verði sennilega þurrt á Norðaustur- og Austurlandi. Sunnudagurinn verði þó blautur með köflum á vesturhelmingi landsins.

„Sem aftur þýðir að þeir sem ætla að vera á Suður- og Vesturlandi þessa miklu ferðahelgi, þeir ættu að reyna að halda sig austanmegin við mitt landið til að eiga möguleika á að það komi góðir dagar þó að laugardagurinn verði vissulega mjög leiðinlegur. “

Siggi segir spár fyrir vestan og austan Atlantshaf lygilega líkar og því auknar líkur á að spáin gangi eftir. 

„En þetta eru hreyfanleg veðurkerfi og það getur hnikast til í tíma og menn verða að hafa það í huga að ég er ekki að boða að allt sé að fara fjandans til. En laugardagurinn þýðir að við verðum að klæða okkur samkvæmt því.“

Ættu þeir sem leggja leið sína á Þjóðhátíð að pakka pollagallanum?

„Miðað við hvernig spárnar líta út núna þá myndi ég segja að það ætti að vera inngönguskilyrði að hafa pollagallann og helst tjöld sem þola rigningu en rigning og rok verður í eyjum líkt og annars staðar á sunnan- og vestanverðu landinu á laugardaginn. Þeir verða í skaplegra veðri á sunnudeginum en þó væta með köflum.“