Þessir þurfa að heilla Amorim

Eftir afhroðið á síðustu leiktíð verða Rauðu djöflarnir ekki í Evrópukeppni í vetur svo fjöldi mínútna er af skornum skammti. Félagið hefur fest kaup á þeim Matheus Cunha og Bryan Mbeumo þó svo að staðan bakvið framherjann í 3-4-2-1 leikkerfi liðsins sé líklega sú best mannað.

Lærisveinar Amorim hófu undirbúningstímabilið á markalausu jafntefli við Leeds United í Svíþjóð. Þaðan hélt liðið til Bandaríkjanna þar sem það lagði West Ham United 2-1 og vann svo gríðarlega öruggan 4-1 sigur á Bournemouth.

Marcus Rashford er farinn á láni til Barcelona og þá hefur Antony, Alejandro Garnacho, Jadon Sancho og Tyrell Malacia verið skipað að finna sér nýtt lið. Hér að neðan má sjá hvaða leikmenn þurfa að heilla Amorim að mati ESPN til að enda ekki á sama lista og leikmennirnir nefndir hér að ofan.

Maston Mount

Hefur átt erfitt uppdráttar á fyrstu tveimur tímabilum sínum hjá Man United. Hefur aðeins spilað 13 deildarleiki vegna krónískra meiðsla. Hefur aðeins einu sinni spilað 90 mínútur, í deildarbikarnum gegn Chelsea í nóvember árið 2023.

Ef Mount finnur sitt besta form gæti hann unnið sér sæti í liðinu. Hans besta staða er fyrir aftan framherjann, þar sem Amorim hefur úr fjölda leikmanna að velja.

Joshua Zirkzee

Framherjinn, sem lýstir sér sem hvorki hreinræktaðri níu né tíu við komuna til Man Utd, átti erfitt uppdráttar á sínu fyrsta tímabili á Old Trafford.

Hluti stuðningsfólksins baulaði hann af velli í tapi gegn Newcastle United í desember. Honum tókst að finna hluta þeirra aftur á sitt band en hann virðist ekki vera sú týpa af framherja sem Amorim vill í sínu liði.

Hefur hæfileikana til að spila í stöðunni á bak við framherjann en líkt og Mount þá er nóg af mönnum í þeirri stöðu.

Luke Shaw

Hvað þarf að segja? Alltaf meiddur og gaf kost á sér á með landsliðinu á EM 2024 þrátt fyrir að missa af síðustu mánuðum tímabilsins þar á undan vegna meiðsla. Var svo meiddur nær allt síðasta tímabil að venju.

Gæti hreinlega fengið sénsinn þar sem Amorim vill örvfættan leikmann sem líður vel á boltanum í þriggja manna varnarlínu sinni.

Kobbie Mainoo

Það efast enginn um hæfileika hins tvítuga Kobbie. Hvar hann passar samt inn í leikkerfi Amorim er stærsta spurningin? Hefur sýnt sínar bestu hliðar sóknarlega þegar hann er flæðandi vinstra megin á miðjunni. Hefur þó ekki verkfærin til að spila sem annar af djúpu miðjumönnum liðsins, hvað þá ef Bruno Fernandes verður við hliðina á honum.

Amorim hefur sagt að hann sé með „stór plön“ er kemur að Kobbie en hefur jafnframt sagt að leikmaðurinn þurfi að auka hraðann sem hann spilar á.

„Við spilum einn leik á viku á næstu leiktíð og samkeppnin er mikil.“

André Onana

Var fenginn til að gera liðið betur spilandi þar sem forveri hans David De Gea var ekki nægilega góður með boltann í fótunum. Onana hefur hins vegar í raun búið til fleiri vandamál en hann hefur leyst. 

Félagið virðist nú í leit að markverði sem sérhæfir sig í að verja boltann og því óvíst hvað framtíðin ber í skauti sér hjá markverðinum litríka frá Kamerún.

Allir 380 leikirnir í ensku úrvalsdeildinni verða sýndir á rásum Sýn Sport.

Hér má tryggja sér áskrift.