„Finnst við búnir að koma Njarð­vík á fótboltakortið hérna á Ís­landi“

„Vonsvikinn og bara virkilega ósáttur með það hvernig við bognum í byrjun seinni hálfleiks“ sagði Gunnar Heiðar Þorvaldsson þjálfari Njarðvíkur eftir tapið í dag.

„Þeir komast á bragðið og við vorum kannski ekki alveg nógu klárir eða litlir í okkur eða hvað það var. Því miður þá bara bognum við þarna og við náum ekki að koma okkur út úr þessu og því miður þá er þetta heldur ekki í fyrsta skipti í sumar sem við lendum í þessum aðstæðum“

Það mátti sjá von kvikna í liði Keflavíkur þegar þeir skora frábært mark og jafna einvígið og um leið mátti sjá Njarðvíkinga verða svolítið litla í sér.

„Þeir skora þarna frábært mark og auðvitað er það eitthvað svona mark sem þarf að vera til þess að brjóta okkur á bak aftur. Mér fannst þeir ekki gera neitt í fyrri hálfleik og við vorum með ágætis stjórn á þessu í fyrri hálfleik og fáum nokkur tækifæri til þess að skora en gerum það ekki“

„Við fórum brattir inn í hálfleik og fórum yfir hlutina sem að við vildum gera í seinni en fótbolti er bara þannig ef þú mætir ekki til leiks og sérstaklega ef að hitt liðið er með reynslu í því að koma inn í svon stærri leiki á réttum mómentum“

Annað mark Keflavíkur var mjög umdeilt en þeir skora þá eftir óbeina aukaspyrnu sem hafði verið dæmd eftir að boltinn hafi verið tæklaður upp í hendurnar á Aroni Snær Friðrikssyni markverði Njarðvíkur.

„Ég sé þetta ekki nægilega vel hvort hann sé að gefa hann til baka endilega eða tækla en ég veit allavega að það er stutt á milli þeirra þarna og ég veit ekki hversu mikill brotavilji er þarna ef Sigurjón Már Markússon er að gefa hann til baka þarna úr þessu færi. Ég sé þetta ekki nægilega vel og er í smá snoker þarna við þá þarna þar sem ég stend“

„Þeir fá þetta og hann klárar þetta upp í skeytin og að fá tvö mörk á sig alveg upp í skeytin er mjög 'brutal' að detta út með þeim hætti“

Mikið var rætt og ritað um málefni Oumar Diouck í aðdraganda leiksins en hann fékk tvö gul og þar með rautt í síðasta leik sem varð til þess að hann tók út leikbann í dag. 

„Þetta er ekki fyrsti leikurinn í sumar þar sem við þurfum að breyta til hvort sem það sé vegna landsliðsverkefna, meiðsli eða leikbönn. Það kom bara maður í manns stað hjá okkur“

Framtíð Gunnars Heiðars Þorvaldssonar er nú í lausu lofti en hann er samningslaus eftir tímabilið hjá Njarðvík.

„Ég er ekki alveg búin að ná hausnum í kringum þetta ef ég á að segja alveg eins og er. Ég er ótrúlega vonsvikinn með það hvernig við klárum tímabilið svona á þennan hátt. Strákarnir eiga mun meira skilið heldur en að detta út eins og þeir gerðu í dag“

„Ég er orðin atvinnulaus núna og það verður bara að skoða það eitthvað í framtíðinni. Ég er ekkert búin að pæla í því neitt. Ég hugsaði svo mikið um að reyna að koma þessum klúbbi upp hérna“

„Ég er ótrúlega ánægður með klúbbinn, strákana og teymið mitt að hafa komið á vagninn og eftir tvö og hálft ár þá held ég að við getum sagt það að ég er gríðarlega stoltur af þeirri vinnu sem að við erum búnir að gera því mér finnst við vera búnir að koma Njarðvík á fótboltakortið hérna á Íslandi“ sagði Gunnar Heiðar Þorvaldsson.