Fram­kvæmda­stjórnin beinir spjótunum að Meta og TikTok

Fyrirtækin eru einnig sögð gera ekki nóg til að gera notendum kleift að flagga ólöglegt efni og að áfrýja ákvörðunum starfsmanna um að fjarlægja efni, eða fjarlægja ekki efni.

Samkvæmt frétt Politico fá forsvarsmenn fyrirtækjanna nú rétt til að svara ásökunum Framkvæmdastjórnarinnar. Falli þau svör ekki í kramið í Brussel standa fyrirtækin frammi fyrir sektum sem gætu samsvarað allt að sex prósentum af heildartekjum þeirra.

Miðillinn hefur eftir talsmanni Meta að félagið hafi ekki brotið gegn lögunum. Breytingar hafi verið gerðar og forsvarsmenn fyrirtækisins hafi trú á því að þeim muni takast að sannfæra framkvæmdastjórnina um að sekta þá ekki.

Talsmaður TikTok slær á svipaða strengi í yfirlýsingu til Politico.

Fyrr á árinu hafði framkvæmdastjórnin gripið til sambærilegra aðgerða gegn X (áður Twitter) sem er í eigu Elons Musk. Þó fjölmiðlar hafi sagt frá því í vor að framkvæmdastjórnin væri að íhuga að sekta X hefur ekki orðið að því enn.

Sjá einnig: Leiðtogar ESB íhuga háa sekt á X og Musk

Donald Trump, forseti Bandaríkjanna, hefur gagnrýnt þessar nýju reglur Evrópusambandsins. Hann segir þær koma niður á bandarískum tæknifyrirtækjum og hefur hótað því að beita Evrópu enn hærri tollum verði lögin ekki felld úr gildi.

Lögin kallast á ensku „Digital Services Act“ og er þeim ætlað að þvinga samfélagsmiðlafyrirtæki til að grípa til aðgerða gegn upplýsingaóreiðu, sem fyrirtækin hafa lengi verið sökuð um að dreifa og gera lygar vinsælar með algóriþmum sínum.