Leggja ríginn til hliðar í tvo klukku­tíma

Opinber æfing hjá efstu mönnum heimslistans hefur ekki sést áður en nýja kynslóðin ætlar að breyta því.

Sinner og Alcaraz eru bestu tennisspilarar heims í dag og hafa tekið við af þrenningunni sem skiptist lengi á því að vinna stóru titlana; Rafael Nadal, Roger Federer og Novak Djokovic.

Sá síðastnefndi er reyndar enn vel spilandi og verður með á ATP mótinu á Ítalíu um helgina, en hefur sjálfur viðurkennt að hann geti ekki haldið í við toppana tvo, Sinner og Alcaraz.

Sinner og Alcaraz hittust og heilsuðust vinalega á blaðamannafundi í gær. Þeir munu svo æfa saman í tvo klukkutíma í dag en æfingin hefst klukkan 10, fyrri klukkutíminn verður á æfingavelli en seinni klukkutíminn á keppnisvellinum þar sem mótið mun hefjast á sunnudag.

Þeir hafa mæst alls fimmtán sinnum og Spánverjinn Alcaraz hefur unnið tíu af þeim viðureignum en Ítalinn Sinner verður vel studdur á heimavelli á þessu móti.

Á síðustu átta risamótum hafa þeir mæst í úrslitum og annar hvor þeirra hefur unnið öll tennismótin á ATP-tímabilinu.

Mótið á Ítalíu, sem hefst á sunnudag og fer fram næstu tvær vikurnar, er síðasta mót tímabilsins og mun ákveða hvor þeirra verður í efsta sæti heimslistans fram á næsta ár.

Sinner situr í toppsætinu sem stendur, með 11.500 stig, en Alcaraz er með 11.250 stig í öðru sætinu. Næsti maður fyrir neðan er Alexander Zverev með 5.560 stig, sem gefur ágætis mynd af yfirburðum hinna tveggja.