KR-konur voru næstum því búnar að kasta frá sér sigrinum

KR-konur enduðu tveggja leikja taphrinu sína og nýliðarnir eru komnir með sex sigra í fyrstu níu leikjum sínum.

KR er komið upp fyrir Keflavík en Keflavíkurkonur eiga leik sinn seinna í vikunni.

Hamar/Þór stóð í heimakonum í fyrri hálfleik en í þriðja leikhlutanum skildu leiðir. Staðan var 47-46 fyrir KR í hálfleik en var orðin 70-56 eftir þrjá leikhluta.

Hamar/Þór kom öflugt til baka í lokaleikhlutanum og náði að minnka muninn niður í eitt stig á lokasekúndunum.

Staðan var 83-70 þegar þrjár mínútur voru eftir en gestirnir unnu næstu mínúturnar 14-2. KR-liðið hélt út og fagnaði sigri

Stelpurnar af Suðurlandinu hafa enn ekki unnið leik í deildinni í vetur en þær hafa verið í mörgum jöfnum leikjum að undanförnu.

Íslenska landsliðskonan Rebekka Rut Steingrímsdóttir kom sjóðheit út úr landsliðsverkefni og skoraði 24 stig í kvöld.

Molly Kaiser var með 20 stig og Eve Braslis skoraði 13 stig. Kristrún Ríkey Ólafsdóttir var með 5 stig og 12 fráköst.

Jadakiss Guinn skoraði 21 stig fyrir gestina, Jovana Markovic skoraði 15 stig og Jóhanna Ýr Ágústsdóttir var með 14 stig.