Hlaup hafið í Skaft­á

„Ég held það sé byrjað hlaup. Það er orðið töluvert vatn hérna,“ segir Björgvin í samtali við Vísi.

Hann lýsir ánni sem grárri, fullri af leðju en hún hafi verið tær í gær. Munurinn á milli daga sé mikill, bæði í lit og vatnsmagni.

Veðurstofan segir hlaupið hafa hafist aðfaranótt sunnudags og að það hafi verið hægvaxandi fram til miðnættis í gær. Síðan þá hafi vatnshæðin verið stöðug.

Rennslið er sagt vera örlítið meira en mesta sumarrennsli, eða um 250 rúmmetrar á sekúndu. Leiðni hefur jafnframt farið vaxandi og hafa tilkynningar borist um brennisteinslykt af ánni.

Ekki liggur fyrir úr hvorum Skaftárkatli hlaupið kemur en í tilkynningu frá Veðurstofunni segir að hlaup úr eystri katlinum séu allajafna stærri en úr þeim vestari.

Síðast hljóp úr ánni í fyrrahaust en þá var það eystri ketillinn sem hljóp en sá vestari hefur ekki hlaupið síðan haustið 2021.

Mikilvægt er að fara varlega nálægt upptökum árinnar vegna mögulegrar gasmengunar.