Spilaði fót­brotinn í úr­slita­keppni NFL

Allen sagði að hann hefði brotið fimmta ristarbeinið í fætinum þegar hann meiddist seint í öðrum leikhluta í 23-20 sigri á Cleveland þann 21. desember síðastliðinn. Allen kláraði leikinn og síðan restina af tímabilinu með því að spila í gegnum meiðslin.

Þrátt fyrir að ganga á hækjum og vera í spelku á fimmtudag sagði Allen að hann hefði getað spilað ef Buffalo hefði átt leik í þessari viku.

Hann tjáði sig í fyrsta sinn síðan Buffalo tapaði 33-30 í framlengingu í umspilsleik í Denver fyrir tveimur vikum og eftir að hafa verið viðstaddur kynningarfund Joe Brady sem nýs aðalþjálfara Bills fyrr um daginn.

Allen þurfti þó að afþakka þátttöku sína í Pro Bowl-leikunum í Super Bowl-vikunni vegna meiðsla.

„Þetta er svolítið sárt núna en þetta var engin stór aðgerð,“ sagði Allen. „Þannig að batinn tekur ekki of langan tíma. Ég verð kominn aftur fyrir æfingabúðirnar og þetta ætti ekki að hamla neinu,“ sagði hann.

Joe Brady var gerður að aðalþjálfara eftir að hafa verið sóknarstjórnandi Buffalo síðastliðin tvö tímabil. Hann tekur við af Sean McDermott, sem var rekinn í síðustu viku eftir níu ára starf.

Allen tók þátt í ráðningarferlinu með því að sitja í viðtölum í sex daga leit þar sem Buffalo íhugaði níu kandídata.

Framkvæmdastjórinn Brandon Beane gaf í skyn í síðustu viku að Allen gæti þurft að gangast undir aðgerð til að laga meiðslin.

„Ég trúi því enn að við höfum verið með liðið til að vinna Super Bowl og aftur, okkur tókst ekki að gera það eina auka leikatriðið og þar bendi ég beint á sjálfan mig,“ sagði Allen.

„Allt héðan í frá snýst um hvernig ég get lagað mín mál. Hvernig get ég verið besti leikstjórnandinn, besti liðsfélaginn, besti leiðtoginn sem ég get verið fyrir Buffalo Bills í framtíðinni? Hvernig lítur það út? Það felst í því að spyrja spurninga, sætta sig við óþægileg svör og síðan aðlagast og halda áfram á grundvelli þess.“