„Verður nú varla verra. Eða jú, kannski“

Ísland tapaði fyrir Dönum í undanúrslitum á föstudagskvöld og Dagur þurfti að játa sig sigraðan gegn Alfreð Gíslasyni og hans mönnum í Þýskalandi. Það verður því grannaslagur Danmerkur og Þjóðverja um gullið en Ísland spilar við Króatíu um bronsið.

Dagur hefur tvisvar fagnað sigri gegn Íslandi á síðustu tveimur mótum, fyrst á HM í Zagreb í fyrra og svo í milliriðli yfirstandandi móts í Malmö.

„Mér líst bara vel á. Þetta er þriðji leikurinn á einu ári. Liðin þekkjast vel og ekkert nýtt undir sólinni. Þetta eru tvö baráttulið með mikinn karakter. Þetta er handboltaleikur þar sem er mikið undir og níundi leikurinn í mótinu, það hefur allt sína kosti og galla,“ segir Dagur.

Mun þá þreyta hafa mikil áhrif í dag?

„Nei, kannski ekki. Ekki nema að þetta er níundi leikurinn og allt það.“

Sigur Dags á Íslandi í fyrra skaut Króötum áfram úr milliriðli á kostnað Íslands. Sér hann fyrir að hann brjóti íslensk hjörtu í dag?

„Er ég ekki búinn að gera nóg af því? Það verður nú varla verra. Eða jú, kannski,“ segir Dagur og glottir við.

Ísland og Króatía mætast klukkan 14:15 í dag í leik um bronsið á EM. Teymi Sýnar mun fylgja liðinu áfram eftir hvert fótmál fram að leik.