Fær sér kengúrutattú

Á blaðamannafundi í Melbourne eftir úrslitaleikinn á sunnudaginn upplýsti þessi 22 ára gamli Spánverji að hann myndi minnast sigursins á Opna ástralska meistaramótinu með húðflúri af kengúru.

„Ég veit nú þegar að það verður kengúra, ég veit bara ekki hvar á líkamanum. Ég er að hugsa um fótinn, kálfann, en ég veit ekki hvort það verður á þeim hægri eða vinstri,“ sagði Carlos Alcaraz.

Alcaraz sigraði serbnesku goðsögnina Novak Djokovic í úrslitaleiknum.

Þetta er ekki í fyrsta sinn sem hann fagnar risamótstitli með bleki á líkamanum. Þegar hann vann sinn fyrsta titil með sigri á Casper Ruud í úrslitaleik Opna bandaríska meistaramótsins árið 2022 fagnaði hann með því að láta húðflúra dagsetningu úrslitaleiksins, „11.09.22“, á upphandlegginn.

Síðar hefur hann einnig látið húðflúra dagsetninguna á sínum fyrsta Wimbledon-titli ásamt jarðarberi, en það er hefð fyrir því að borða jarðarber á breska mótinu.

Alcaraz er einnig með húðflúr af Eiffelturninum til minningar um sinn fyrsta titil á Opna franska meistaramótinu. Fyrir ofan húðflúrið frá Opna bandaríska hefur hann síðar látið bæta við Frelsisstyttunni og Brooklyn-brúnni.