Dagur hálfri mínútu á eftir meistara Klæbo

Dagur fór hæðótta brautina, sem var 1,5 km að lengd, á 3:40,09 mínútum, eða 32,72 sekúndum á eftir fljótasta manni. Aðeins þrjátíu fljótustu keppendurnir fara áfram í úrslit síðar í dag.

Fyrr í dag endaði Kristrún Guðnadóttir í 61. sæti í undankeppninni í sprettgöngu kvenna.

Norðmaðurinn Johannes Klæbo átti besta tímann í undankeppni karla eða 3:07,37 mínútur. Hann er langlíklegastur til þess að landa gullverðlaununum í greininni, eins og hann hefur gert á síðustu tvennum leikum.

Klæbo er þegar búinn að vinna Ólympíumeistaratitilinn í 20 km skiptigöngu um helgina, og hefur þar með unnið sex Ólympíugull á ferlinum.

Dagur, sem varð í 66. sæti í skiptigöngunni, keppir í fjórum greinum á leikunum. Hann verður næst á ferðinni á föstudaginn í 10 km göngu með frjálsri aðferð, og endar svo á 50 km göngu með hefðbundinni aðferð þann 21. febrúar.