Að­skota­hlutur í lifrar­pylsu: „Mál sem við tökum mjög al­var­lega“

Í fréttatilkynningu frá SS segir að síðasti notkunardagur lotunnar sem innköllunin nær til sé  04. mars 2026. Neytendur sem hafa keypt soðna lifrarpylsu úr þessari lotu séu beðnir um að farga vörunni eða skila vörunni til viðkomandi verslunar eða beint til Sláturfélags Suðurlands svf, Fosshálsi 1, 110 Reykjavík. Beðist sé innilegrar velvirðingar á þeim óþægindum sem þetta kann að valda.

Járnflís eða álhefti

Sá sem tilkynnti aðskotahlutinn gerði Vísi viðvart um málið og sagðist telja að um járnflís væri að ræða. Hann hefði verið að brytja lifrarpylsuna niður fyrir barnunga dóttur sína þegar hann varð flísarinnar var.

Í samtali við Vísi segir Steinþór Skúlason, forstjóri SS, að talið sé að aðskotahluturinn sé svokallað álhefti. Enn sé þó verið að greina hann. Ýmis málmleitar- og gegnumlýsingartæki séu í framleiðslulínu fyrirtækisins, sem eigi að girða fyrir að vörur með aðskotahlutum í komist í gegnum línuna.

Aðeins ein tilkynning

„Þannig að við erum að fara yfir það allt líka. Þetta er mál sem við tökum mjög alvarlega og þess vegna er þessi innköllun.“

Þá segir hann að fyrirtækinu hafi aðeins borist þessi eina tilkynning um aðskotahlut í slátrinu. „Við förum frekar á varkárari hliðina og innköllum frekar en að gera það ekki.“