Dagur gaf vel í eftir ró­lega byrjun

Dagur byrjaði rólega og datt niður í 81. sæti eftir fyrsta hringinn, en bætti jafnt og þétt í hraðann og vann sig upp listann.

Hann var í 70. sætinu þegar hann kom í mark á tímanum 24:18,1 en einn keppandi var dæmdur úr leik og Dagur stökk upp í 69. sætið. 

Þetta var þriðja keppni Dags en hann náði bestum árangri í 20 kílómetra skiptigöngu, 66. sæti, og hafnaði síðan í 79. sæti í sprettgöngunni.

Dagur keppir sína fjórðu og síðustu keppni á Vetrarólympíuleikunum laugardaginn 21. febrúar, þegar 50 kílómetra keppni í hefðbundinni skíðagöngu fer fram.

Klæbo vann áttundu gullverðlaunin

Norðmaðurinn Johannes Klæbo vann gullverðlaun eftir mikla baráttu við samlanda sinn Einar Hedegart og hinn franska Mathis Desloges.

Hedegart leiddi keppnina og var lengi með besta tímann en enn og aftur átti Klæbo hreint ótrúlegan endasprett til að tryggja sér gullið í 10 kílómetra göngunni.

Hedegart náði ekki að halda í við hann og féll niður í þriðja sæti en Mathis Desloges fékk silfur.

Með þessum gullverðlaunum jafnaði Johannes Klæbo samlanda sinn Björn Dæhle sem sigursælasti skíðagöngukappi sögunnar á Vetrarólympíuleikunum.

Þeir hafa báðir unnið átta gullverðlaun í skíðagöngum en Klæbo getur unnið sín níundu gullverðlaun laugardaginn 21. febrúar þegar 50 kílómetra keppnin fer fram.