„Það var eins og við værum á heima­velli“

„Það voru án efa sveiflur í þessu en við áttum mjög góðan annan leikhluta. Við búum þar í raun til ákveðið forskot og vorum yfir í hálfleik. Við stöndum af okkur fyrsta áhlaup Keflavíkinga og þá var þetta langt komið,“ sagði eftir sigur liðsins í kvöld.

„Þeir eru auðvitað með mjög gott lið og við vissum að þeir myndu bíta frá sér og þeir gerðu það. Hrós á okkar drengi, það er ekkert launungarmál að við erum laskaðir. Það er búið að vera ströggl að ná saman tíu manna hóp og spila fimm á fimm á æfingum. Ég er því mjög ánægður að við skulum hafa náð að kreista þetta út.“

Í fyrri hálfleik sást að báðir þjálfarar liðanna voru bersýnilega óánægðir með margar ákvarðanir dómaraþríeykisins. Jóhann vildi þó hvorki gagngrýna dómgæsluna né hrósa henni sérstaklega.

„Nei, er ekki alltaf svo erfitt að dæma? Mér skilst það sé þannig. Nei, nei, pass. Það er líka mjög erfitt að spila og allt það. Það eru allir að reyna að gera sitt besta og ég hef fulla trú á að það eigi við dómarana líka. Auðvitað einhver atriði sem maður er hundfúll með, en það er bara eins og það er.“

Stuðningsmenn Grindavíkur settu sterkan svip á stemninguna í höllinni. Þeir stóðu nánast allan leikinn og sungu af krafti, á meðan stuðningsmenn Keflavíkur voru talsvert rólegri.

„Stuðningsmennirnir gefa okkur helling og þetta var alveg geggjað í kvöld. Það var eins og við værum á heimavelli. Það býr auðvitað hellingur af fólki hérna í Reykjanesbæ en það þarf samt að mæta. Það er meðbyr með liðinu, það er meira gaman að vinna heldur en að tapa. Þetta var bara geggjað í kvöld og vonandi það sem koma skal.“