„Það sem er búið að gera í allan vetur virkar ekki“

Álftanes tapaði gegn Val á heimavelli í síðasta leik, 108-87, og situr í 8. sæti í landsleikjahléinu til 6. mars. Njarðvík og Þór Þ. koma skammt á eftir og því gæti farið svo að Álftnesingar missi hreinlega af úrslitakeppninni.

„Það eru margir leikmenn þarna sem eru mjög skemmtilegir, og það á að vera hægt að búa til mjög skemmtilegt lið. Umgjörðin í kringum liðið er mjög skemmtileg og það er yfirleitt mjög góð mæting á leiki þarna,“ sagði Sævar Sævarsson í Körfuboltakvöldi.

Stemningin virtist þannig öll mjög góð og meðbyr með liðinu en…:

„Þetta er búið að vera rosalega þungt og erfitt að horfa á þá.“

Jón Halldór Eðvaldsson, eða Jonni, var með hugmynd fyrir Hjalta Þór Vilhjálmsson, þjálfara Álftaness, sem fólst í að treysta minna á uppstilltan sóknarleik:

„Hættum að spila fimm á núll, og hlaupum helvítis gólfið. Þú ert með þannig lið í höndunum. Sprengdu þetta aðeins upp og vertu með læti. Það er nefnilega klárt mál að það sem er búið að gera í allan vetur virkar ekki.“