„Gaman að hann hafi tekið eftir mér þar“

Alfa Brá hefur spilað hjá Fram síðustu þrjú ár og með góðri spilamennsku öðlaðist hún sæti í íslenska landsliðinu. Það var einmitt þar, í leik með landsliðinu á HM í Þýskalandi, sem þjálfari þýska stórliðsins Thuringen tók fyrst eftir henni.

„Já það er gaman að hann hafi tekið eftir mér þar. Svo var hann bara í samræðum við umboðsmanninn minn og þegar ég fékk þetta tækifæri varð ég strax spennt. Þetta er flottur klúbbur og ég er mjög spennt fyrir þessu,“ sagði Alfa en vissi hún að það væri verið að fylgjast með henni á HM?

„Nei en auðvitað er þetta stór vettvangur og þangað koma liðin til að fylgjast með og skoða leikmenn. Þannig að það kemur manni ekkert á óvart en maður var ekkert að pæla í því.“

Um er að ræða risastórt skref því Thuringen er eitt af toppliðunum í þýska handboltanum og varð Evrópudeildarmeistari í fyrra, en góður handbolti var ekki það eina sem heillaði Ölfu þegar hugmyndin um að flytja til Þýskalands kom upp. Kærasti hennar, landsliðsmaðurinn Reynir Þór Stefánsson, spilar einnig í Þýskalandi með liði Melsungen.

„Ég valdi nú kannski ekki út frá því en auðvitað er það bónus að vera nálægt kærastanum mínum í Þýskalandi, en það var ekki endilega það sem gerði útslagið… Þetta er svona einn og hálfur klukkutími á milli bæja en við ætlum að reyna að búa þarna í miðjunni. Það er þess virði, þó maður þurfi að keyra smá.“

Skiptin til Thuringen ganga ekki formlega í gegn fyrr en í sumar og Alfa er enn leikmaður Fram en hún mun ekki spila meira með liðinu vegna meiðsla í baki.

„Það eru þvílík vonbrigði að detta út svona í lok tímabils og missa af úrslitakeppninni. Þær eiga einmitt leik núna á laugardaginn [gegn ÍR í umspilinu] og það er bara mjög vont að vera ekki að spila með þeim,“ sagði Alfa en hún væntir þess að vera orðin góð fyrir undirbúningstímabilið með Thuringen.

Fjallað var um félagaskipti Ölfu Brár í Sportpakka Sýnar í gærkvöldi. Innslagið má sjá í spilaranum að ofan.