Hitti ó­vart og fékk síðan flautukörfu í and­litið

Liðin kepptust samt við að „vinna“ og „tapa“ leiknum á lokasekúndunum en það er óhætt að segja að síðustu fimm sekúndurnar hafi verið dramatískar í IceMar-höllinni í Njarðvík í gær.

Danielle Rodriguez kom Njarðvík yfir í 85-84, úr hraðaupphlaupi fjórum sekúndum fyrir leikslok. Tindastóll tók leikhlé og eftir það skoraði Madison Sutton laglega körfu og fékk víti að auki. Staðan var þá orðin 86-85 fyrir Stólana og aðeins 1,2 sekúndur voru eftir.

Sutton virtist síðan ætla að reyna að klikka úr vítinu því þá hefðu Njarðvíkurkonur þurft að fara upp allan völlinn og taka neyðarskot.

Hún reyndi að klikka á vítaskoti sínu en það gekk ekki betur en svo að boltinn skoppaði á hringnum og þaðan ofan í körfuna. Það mátti sjá á viðbrögðum hennar að hún var svekkt að boltinn skyldi fara ofan í körfuna. Það var ekkert skrýtið því með þessu gaf hún Njarðvíkurkonum líflínu.

Njarðvíkurkonur fengu nefnilega leikhlé, gátu fært boltann upp völlinn og auk þess sett upp lokaskot.

Þar sýndi Brittany Dinkins snilld sína. Hún fékk frábæra hrindrun frá Danielle Rodriguez, greip boltann eftir innkastið frá Huldu Maríu Agnarsdóttur, snéri sér eldsnöggt við og skoraði magnaða þriggja stiga körfu um leið og leiktíminn rann út.

Njarðvíkurkonur fögnuðu gríðarlega en Stólarnir voru komnir í sumarfrí þrátt fyrir hetjulega baráttu.

Það má sjá þessar mögnuðu lokasekúndur hér fyrir ofan.