„Það gerist ekkert ef ljósin eru slökkt“

Tekist hefur að draga úr orkunotkun flugbrautaljósa Keflavíkurflugvallar um allt að áttatíu prósent með nýrri tækni. Ljósafjöldinn á brautunum skiptir þúsundum.

Í kvöldfréttum Sýnar má sjá flugvél Icelandair frá New York nálgast Keflavíkurflugvöll snemma að morgni. Ljósadýrð flugbrautarinnar birtist sem flugmennirnir horfa á í lokaaðfluginu til að hitta á réttan stað á brautinni.

Tíu manna raftæknideild Keflavíkurflugvallar undir stjórn Jóns Grétars Herjólfssonar annast brautaljósin. Á stórum skjá sýnir Jón Grétar okkur yfirlitsmynd af flugvellinum. Á henni sést hvaða flugbraut er í notkun hverju sinni og á hvaða brautaljósum er kveikt.

„Þetta eru sem sagt ljósin sem eru í notkun, miðlínan og kantljós. Og hérna sést aðflugsbúnaður sem er í notkun á hverjum enda, sem er bæði „localizer“ og „glideslope“,“ segir Jón Grétar.

Við spyrjum hvort það sé ekki einhver mikilvægasti rekstrarþáttur flugvallarins að hafa brautaljósin í lagi.

„Jú, jú. Það gerist ekkert ef ljósin eru slökkt, sérstaklega ef það er myrkur,“ svarar Jón Grétar og hlær.

Í sjónvarpsfréttinni sjáum við flugstjóra Airbus þotu Play lenda í nýdimmri þoku. Áhorfendur geta séð aðflugsljósin birtast flugstjóranum áður en hann sér sjálfa flugbrautina.

Ljósaröðin við brautina er ein helsta forsenda þess að flugmönnum leyfist að lenda flugvélum í Keflavík allt niður í þrjátíu metra skýjahæð, sem eykur verulega notagildi vallarins og rekstraröryggi flugsins.

Og það er enginn smáræðisfjöldi ljósa sem fylgir flugbrautunum.

„Þau eru ábyggilega einhvers staðar í kringum fimm til sexþúsund, svona þegar allt er talið.“

Með nýrri tækni hefur tekist að draga úr rafmagnseyðslu brautarljósanna um allt að áttatíu prósent á undanförnum árum, að sögn Jóns Grétars. Endurnýjun ljósanna hófst árið 2016 og stendur enn yfir.

„Við náttúrulega erum búnir að færa okkur svolítið mikið í LED ljós. Það er svona það nýjasta hjá okkur,“ segir Jón Grétar Herjólfsson, rekstrarstjóri raftæknideildar Keflavíkurflugvallar, hér í frétt Sýnar:

Fjallað er um Keflavíkurflugvöll í nítjánda þætti Flugþjóðarinnar. Áskrifendur geta séð alla þættina hvenær sem er á streymisveitunni Sýn+.

Í kynningarstiklu má sjá dæmi um umfjöllunarefni þáttanna sjö í þriðju seríu Flugþjóðarinnar:

Kynningarstiklu fyrir seríu númer tvö má sjá hér:

Kynningarstiklu fyrstu seríu má sjá hér: