Stighæsti leik­maður Ólympíu­leikanna látinn

Fjölskylda Schmidt sagði í yfirlýsingu að Schmidt hefði barist við heilaæxli í fimmtán ár „með hugrekki, reisn og seiglu og var áfram fyrirmynd um ákveðni, örlæti og lífsgleði.“

„Oscar skilur eftir sig arfleifð sem nær út fyrir íþróttina og veitir kynslóðum íþróttamanna og aðdáenda í Brasilíu og um allan heim innblástur.“

Schmidt spilaði aldrei í NBA-deildinni en er dáður í Brasilíu fyrir að helga sig landsliðinu, spila á fimm Ólympíuleikum í röð, sem er jöfnun á meti, og setja stigamet sem enn standa. Hann var einnig stjarna í sögulegum sigri gegn Bandaríkjunum í úrslitaleik Pan-Ameríkuleikanna árið 1987.

Hann hóf atvinnumannaferil sinn árið 1974 og varði mestum hluta hans heima fyrir og á Ítalíu, þar sem hann varð æskuhetja framtíðarstjörnunnar Kobe Bryant.

Árið 1984 valdi New Jersey Nets í NBA-deildinni hann í sjöttu umferð og hann æfði með þeim en hafnaði samningi. Á þeim tíma var NBA-leikmönnum heldur ekki heimilt að spila með landsliðum.

Hann var 2,03 metrar á hæð og var afbragðs þriggja stiga skytta á níunda áratugnum þegar margir þjálfarar mæltu gegn því. Það færði honum gælunafnið „Mão Santa“ eða heilaga höndin.

Schmidt lék sinn fyrsta leik fyrir Brasilíu nítján ára gamall árið 1977 og spilaði á öllum Ólympíuleikum frá 1980 til 1996. Hann er stigahæsti leikmaður í sögu Ólympíuleikanna með 1093 stig eða 304 stigum meira en næsti maður. Hann lék alls 38 leiki á Ólympíuleikunum og skoraði því 28,8 stig að meðaltali í leik.

Hann var stigahæstur á Ólympíuleikunum árin 1988 (42,3 stig að meðaltali í leik), 1992 og 1996. Hann á enn sjö af tíu stigahæstu leikjum í sögu Ólympíuleikanna.