„Er ekki að sjá þennan orkumikla bolta sem manni var lofað“

FH tapaði 3-0 fyrir Val á fimmtudaginn. Þetta var annað tap FH-inga í Bestu deildinni í röð en þeir eru eitt fjögurra liða sem eru einungis með eitt stig.

„Það er mikið búið að tala um FH, og við bjuggumst við því, að það yrði ákveðin ákefð í þeirra leik, þeir myndu vinna boltann hátt uppi og þetta væri ungt lið með mikla hlaupagetu en mér fannst þeir rosalega flatir í þau skipti sem þeir reyndu að pressa Valsmenn,“ sagði Albert í Stúkunni í fyrradag.

„Ég er ekki að fatta hvert uppleggið er hjá FH-ingum. Ég er ekki að sjá þennan orkumikla bolta sem manni var lofað.“

Halldór Árnason hvetur FH-inga til að halda sig við sína leið og reyna að vera betri í því sem þeir ætla að gera.

Hálft í hálft er aldrei gott

„Það er kannski áhyggjuefni að í síðasta leik í Garðabæ mætir FH og reynir að pressa Stjörnuna. Þeir fara í gegnum hjartað, spila með jörðinni í gegnum FH-liðið. Núna spilar Valur út og svo yfir pressuna og það virkaði líka,“ sagði Halldór.

„Ég myndi vilja sjá FH í 4-4-2, í aggresívri pressu og vera betri í því. Ég ber virðingu fyrir því að þeir gáfu út hvað þeir ætluðu að gera. En mér fannst þeir vera hálft í hálft núna sem er aldrei gott.“

FH-ingar einir staðið við sitt

Halldór vonar að Jóhannes Karl Guðjónsson, þjálfari FH, sé ekki farinn að hafa áhyggjur af stöðu mála.

„Það voru nokkur lið sem voru með yfirlýsingar að þau ætluðu að gera hlutina svona og hinsegin fyrir tímabilið. FH er eina liðið sem hefur staðið við það og gert það alla leið. Þeir vilja pressu, fóru í pressu til að byrja með í leikjunum og eru með ungt lið, eitt yngsta lið sem við höfum séð í efstu deild lengi,“ sagði Halldór.

„Eina leiðin til að verða betri í þessu, sem er nýtt fyrir þeim og þetta eru ungir strákar, er að þora. Það gæti orðið þungt. Ég vona að stuðningurinn sé endalaus í Hafnarfirði því það var gefið út að svona ætluðu þeir að gera hlutina. Þannig að fariði, pressiði, veriði aggresívir, spilið á ungum mönnum og það mun skila sér að lokum.“

Næsti leikur FH er gegn toppliði KR á útivelli á mánudaginn kemur.

Umræðuna úr Stúkunni má sjá í spilaranum hér fyrir ofan.