„Það væri óskastaðan“

Valur Páll Eiríksson skrifar 29. apríl 2026 12:32

Snorri Steinn fær góðan tíma með nýjum mönnum í komandi verkefni. Aðrir fastamenn fá stærra hlutverk en þeir hafa fengið í undanförnum verkefnum. Vísir/Vilhelm

Heldur óhefðbundinn landsliðshópur var opinberaður af Snorra Steini Guðjónssyni í gær fyrir leiki Íslands í Egyptalandi í maí. Einhverjir fá hvíld á meðan aðrir eru meiddir. Í því leynast tækifæri fyrir aðra.

Margur rak upp stór augu þegar landsliðshópurinn var kynntur í gær. Þremenningarnir úr Magdeburg, þeir Gísli Þorgeir, Ómar Ingi og Elvar Örn eru til að mynda allir fjarverandi sem og Janus Daði Smárason. Það er því nánast ný útilína sem fær að spreyta sig.

„Auðvitað eru Steini [Þorsteinn Leó Gunnarsson], Haukur [Þrastarson] og Teitur [Örn Einarsson] menn sem hafa allir verið þarna og hafa gert það gott með okkur. Núna fá þeir það hlutverk að vera lykilmenn og bera uppi okkar leik í þessum leikjum. Það er kannski líka bara gott og gaman fyrir þá að vera í því hlutverki og sýna að þeir séu að narta í hina,“ segir Snorri Steinn í Sportpakkanum á Sýn í gær.

„Svo eru aðrir þarna sem eru næstir inn.“

Svipuð staða er uppi með línu- og varnarmenn. Elliði Snær Viðarsson og Ýmir Örn Gíslason verða ekki með og áðurnefndur Elvar Örn hefur einnig verið lykilmaður í vörn. Þar gefast tækifæri líka.

„Það liggur aðeins í hlutarins eðli. Strákarnir sem þú nefnir eru hjartað í okkar varnarleik og aðrir fá tækifæri til að stimpla sig betur inn.“

Óreyndir menn fá tækifæri

Tækifæri bjóðast mönnum sem spila í þessum stöðum. Óreyndari menn á við Einar Braga Aðalsteinsson, Reyni Þór Stefánsson og Tryggva Þórisson fá tækifæri til að sanna sig - og vonandi gefa landsliðsþjálfaranum hausverk við val næsta hóps.

„Ég ætla að nota þetta til að sjá hverjir ætla virkilega að negla þetta og gera sig virkilega gildandi með okkur á næsta stórmóti. Ég horfi svolítið á þetta þannig. Draumastaðan er að ég sé með hluti í höndunum sem ég sé fyrir mér að nota í janúar, að hausverkurinn væri aðeins meiri heldur en hitt. Það væri óskastaðan,“ segir Snorri Steinn.

Töluvert fleira kemur fram í viðtali við Snorra Stein sem sjá má í heild að neðan.

Klippa: Snorri Steinn ræðir óhefðbundinn hóp og nýja menn