Þor­leifur: Ég verð ekki með liðið á næsta ári

Þjálfari Grindavíkur var að sjálfsögðu súr með útkomuna í kvöld þegar hann mætti til Andra Más Eggertssonar. Hvar fannst honum leikurinn fara í kvöld?

„Bara í upphafi leiks. Þetta var eins og þriðji leikurinn. Njarðvíkingar byrjuðu af hörku og héldu þeim takti út fyrri hálfleikinn. Við svona náðum að hanga inn í þessu en þetta var of mikið og við mættum ekki nógu klárar í þetta.“

Grindavík var 13 stigum undir í hálfleik en komust yfir í þriðja leikhluta. Hvað gekk vel þar?

„Við settum upp sóknir þar sem við vorum að ráðast á þær en svo þegar þær fóru að bregðast við því þá forum við að gera eitthvað allt annað. Það voru klárlega opnanir þó svo að þær voru að reyna að koma þeim í einn á einn sem virkar illa gegn Abbie. Ég tók leikhlé til að koma í veg fyrir að Njarðvík kæmist á sprett og teiknaði upp lausnir sem ég hélt að þær sæu ekki en hugsandi til baka þá vorum við of fljótar að fara út úr því sem var að virka.“

Svo kom fjórði leikhlutinn. Hvernig var að horfa upp á leikinn í fjórða leikhluta.

„Svekkjandi. Það var erfitt að horfa upp á þetta. Maður vill ekki detta út, maður vill verða meistari og við vorum klárlega með lið í það. Svo kom maður inn í klefa eftir þetta og safnaði þeim saman til að þakka þeim fyrir tímabilið. Ég var samt svolítið mát hugsandi til baka en við erum búin að lenda í meiðslum og ótrúlegu veseni og það er bara rétt fyrir úrslitakeppni sem við erum allar mættar á æfingu og getum spilað 5 á 5. Ég tel það klárlega hafa áhrif í svona mikilvægum leik þar sem við þurfum að vera allar á sömu blaðsíðunni og þurftum að treysta á einstaklingsframtak sem var ekki að virka.“

Þorleifur var svo spurður að því hvernig tilfinningin væri að vera að detta út úr einvígi eftir að hafa komist í 2-0.

„Ég hugsa að niðurstaðan sé bara að ég kunni ekki að vinna sem þjálfari. Það er ekki dýpra en það. Við vorum að tala um lausnir og liðið og ég leyfði þeim að hafa skoðanir á hlutunum og kannski eru það mistök sem ég gerði sem þjálfari en verandi kominn í 2-0 yfir þá er það fjórði leikhlutinn í fjórða leiknum þar sem við töpuðum einvíginu. Við skorum þrjú stig og erum litlar í okkur og hræddar. Það er ekki bara liðinu að kenna, þar er þjálfarinn stór partur af þessu. Ég hélt og reyndi að koma skilaboðum til þeirra og það var ekki nógu gott. Ef það er ástæðan þá tek ég það bara á kassann því þetta var ekki nógu gott þar sem við vorum komnar í 2-0.“

Þorleifur var því spurður að því hvort hann yrði með liðið áfram á næsta ári.

„Ég verð ekki með liðið á næsta ári. Þetta er held ég komið gott. Það er nóg af öðrum hlutum sem ég þarf að einbeita mér að. Komið gott fyrir mig að vera kvennaþjálfari í Grindavík og kominn tími til að fá nýtt blóð inn.“

Hvernig gerir Þorleifur feril sinn upp sem þjálfari þegar ferlinum er lokið?

„Í bili. Nú ætla ég að vera sjálfboðaliði fyrir Grindavík og ætla mér að vera besti sjálfboðaliðinn fyrir liðin og kannski reyna að ná inn einhverju fólki á kvennaleikina því það var ekki alveg nógu gott hjá okkur.“