„Leið­toginn okkar og hjartað og sálin í liðinu“

Pargo snéri aftur til Grindavíkur í lok janúar og Andri byrjaði á að spyrja hann hvaða þýðingu það hefði fyrir hann að vera kominn í úrslit.

„Það var alltaf markmiðið. Jói var með ákveðna sýn í huga þegar hann hafði samband við mig og til allrar hamingju þá gekk hún upp.“

Kane fór fyrir stigaskori Grindavíkur í kvöld og í upphafi leiks var hann eiginlega sá eini í liði Grindavíkur með einhverja rænu sóknarlega. 

„Ég vildi bara vinna. Ég vaknaði í morgun og sendi skilaboð á hópspjallið hjá liðinu um að við þyrftum að mæta einbeittir til leiks. Sýna okkar bestu hliðar og koma með mikla orku í leikinn. Ég ætlaði mér að setja tóninn og gerði það nokkurn veginn og strákarnir fylgdu svo í kjölfarið.“

Andri spurði Pargo í kjölfarið út í hugarfarið hjá Kane en hann vildi meina að Kane væri að draga úr sínum áhrifum á liðið frekar en hitt.

„Kane er að ljúga þegar hann segir að hann hafi eiginlega sett tóninn. Hann gerði það hundrað prósent. Hann mætti til leiks og skoraði tíu stig í fyrsta leikhluta og tók bæði sóknar- og varnarfráköst. Hann er leiðtoginn okkar og við fylgjum honum að hjara veraldar.“

Valsmenn komust tíu stigum yfir í upphafi annars leikhluta. Þá tók Jóhann Þór leikhlé og leikurinn snérist við nánast á punktinum.

„Við vorum í fínu lagi. Við þurftum bara að hreinsa upp suma hluti sem við vorum að klúðra í fyrsta leikhluta og við vissum að ef við myndum gera það myndum við sigla fram úr þeim. Það er það sem gerðist.“

Andri spurði Kane hvaða merkingu það hefði fyrir hann að vera kominn í úrslit með Grindavík í annað sinn. 

„Þetta er mér allt. Þessir stuðningsmenn eru bestu stuðningsmenn á landinu í mínum huga. Þetta er þriðja tímabilið mitt hérna. Fyrsta árið töpuðum við fyrir Val, í fyrra í oddaleik gegn Stjörnunni. Þetta árið náðum við sigrunum og erum á leið í úrslit. Við viljum virkilega klára þetta og fara alla leið. Við skuldum stuðningsmönnunum það og okkur sjálfum. Við höfum lagt hart að okkur allt tímabilið og titillinn er markmiðið.“

Það virðast allir og amma þeirra hafa skoðun á því hvernig leikmaður og karakter Kane er en Pargo sagði að leikmenn Grindavíkur pældu ekkert í því hvað fólk segir.

„Okkur er sama hvað fólki finnst, við vitum hver hann er. Ef þú veist ekki hver hann er þá er okkur sama hvað þér finnst. Við vitum að hann er leiðtoginn okkar og hjartað og sálin í liðinu.“

Á þessum tímapunkti í viðtalinu kom Ólafur Ólafsson aftan að Andra og lyfti honum upp svo hann væri jafn hár viðmælendum sínum. Hann spurði Kane sömuleiðis út í þessar sterku skoðanir þjóðarinnar á honum.

„Ég heyri allskonar gróusögur um sjálfan mig en ég er hress gaur! Ég vil bara hafa gaman en þegar ég er á vellinum legg ég mig allan fram og er mikill keppnismaður. Spila af fullum krafti fyrir liðið mitt og stuðningsmenn. Utan vallar er ég mjög skemmtilegur, það er ekkert nema ást og vil hafa gaman en á vellinum er ég 100 prósent innstilltur.“

Andri spurði Pargo að lokum út í verkefnið framundan, lokaúrslit gegn Tindastóli.

„Við ætlum að mæta og spila okkar leik. Svo lengi sem við gerum það erum við í góðum málum. Svo fær mamma að horfa á leikina í sjónvarpinu svo að ég er í toppmálum.“

Viðtalið í heild má sjá í spilaranum hér að neðan.