Beygjur og hring­torg mesta á­skorunin fyrir vindmyllulestina

Um eina mestu þungaflutninga vegakerfisins er að ræða. Hver vindmylluspaði vegur um tuttugu tonn. Hlutirnir sem þarf að flytja vega á milli tuttugu og 60 tonn. Hlutirnir sem voru fluttir í nótt vógu um 60 tonn alls. Venjulegur fólksbíll er til samanburðar um eitt tonn. 

„Jómfrúarferðin gekk mjög vel, lögreglan stóð sig vel að stjórna og stýra lestinni sem lagði af stað frá Þorlákshöfn rétt um miðnætti og við vorum komin örugglega upp í Vaðöldu rétt rúmlega fimm,“ segir hann og að það sé innan þeirra áætlana sem Landsvirkjun gerði um ferðina.

Sigurgeir segir litla umferð hafa verið á svæðinu og þeir fáu sem hafi lent í að bíða hafi sýnt þolinmæði. Hann segir enga þörf á að skoða neina vegi eða beygjur eða neitt slíkt, allt hafi gengið vel.

„Við erum mjög ánægð með hvernig gekk.“

Fram kom í frétt í gær að flutningarnir taka um sjö til tíu vikur. Þrjá daga þarf fyrir flutninga á hverri vindmyllu og alls þarf að flytja 14 vindmyllur í sumar. Svo aftur sama magn næsta vor. Nú eigi eftir að fara í 41 ferð sem dreifist á næstu sex til tíu vikur.

„Næsta ferð er skipulögð í kvöld,“ segir Sigurgeir.

Í hverri ferð eru fluttir um fimm spaðar en hver þeirra er um 68 metrar á lengd og eru bílarnir því um 80 metrar á lengd. Til samanburðar er Hallgrímskirkjuturn um 74,5 metrar á hæð.

Á vef Landsvirkjunar er hægt að finna ýmsar upplýsingar um flutningana. Þar kemur til dæmis fram að meðalhraði flutningslestar er áætlaður um 30 km/klst sem þýðir að ferðatími frá Þorlákshöfn í Vaðölduver verður yfirleitt 4–6 klukkustundir. Hver flutningalest getur orðið allt að 250 metra löng. Flutningsleiðin er um 130 kílómetra löng og er ekið frá Þorlákshöfn um Nesbraut og Laxabraut, eftir Suðurstrandarvegi (427), Eyrarbakkavegi (34), Votmúlavegi (310), Gaulverjabæjarvegi (33), Suðurlandsvegi (1) og Landvegi (26).

Vindmyllurnar eru alls 28 og samanstanda af þrettán hlutum. Í kynningarmyndbandi frá Landsvirkjun kemur fram að vegirnir hafi verið yfirfarnir vegna þessara þungaflutninga og að allar vegabætur hafi verið gerðar í samstarfi við Vegagerðina.

Lögreglan á Suðurlandi stýrir flutningunum. Íris Edda Heimisdóttir, aðalvarstjóri hjá Lögreglunni á Suðurlandi, segir þessa fyrstu ferð hafa gengið afar vel.

„Þetta gekk mjög vel fyrir sig, þetta eru mjög krefjandi flutningar og að mörgu leyti hefðbundnir fyrir lögregluna en það sem er örðuvísi fyrir þessa flutninga er að þeir eru margir, þungir og svo eru vagnarnir langir,“ segir hún og að mesta áskorunin sé í beygjum og á hringtorgum.

Ökumönnum er bent á að halda góðri fjarlægð og reyna alls ekki að taka fram úr flutningalestinni. Mæti þeir lestinni er best að víkja til hliðar og bíða.

„Með svona hefðbundna flutninga þá förum við á tímum þar sem er minni umferð og biðlum til þeirra sem eru á ferðinni að sýna tillitssemi og þolinmæði,“ segir Íris Edda.

Hún segir lögregluna hafa verið vel undirbúna í gær.

„Við vorum við öllu búin, þetta var smá frumraun hvað þetta varðar. Þetta eru margar ferðir og umfangið í kringum þetta og lengdin á spöðunum.“

Eins og fram kom standa flutningarnir í nokkrar vikur. Íris Edda segir það þó ekki auka álagið of mikið á lögregluna. Það þurfi að bæta við mannskap á vaktina en það flútti þó nokkuð vel með vaktinni sem er. Einhverjir lögreglumenn séu þó alltaf eyrnamerktir í þetta verkefni á vaktinni.