Biðst afsökunar á „óafsakanlegri hegðun“

Valur Páll Eiríksson skrifar 15. maí 2026 16:01

Jon Rahm missti aðeins stjórn en var fljótur að sjá að sér. Getty/Michael Reaves

Jon Rahm hefur beðist afsökunar á því að hafa í bræði sinni slegið torfi í sjálfboðaliða á PGA-meistaramótinu.

Rahm átti slakt högg á sjöundu braut Aronimink-golfvellinum á fyrsta hring mótsins í gær og brást hinn reiðasti við.

„Annað skotið mitt flaug og fór alltof langt. Þetta var ekki á góðum stað og vegna gremju reyndi ég að sveifla í loftið, rétt yfir grasið, en var ekki að horfa. Ég sló upp torfi sem fór því miður beint í sjálfboðaliða,“ segir Rahm.

Rahm bað viðkomandi strax afsökunar sem fékk torf í bæði andlit og öxl.

„Mér gæti ekki liðið verr. Það er ástæðan fyrir því að ég baðst afsökunar. Ég þarf að hafa upp á viðkomandi og gefa honum gjöf vegna þess að þetta er óafsakanlegt og eitthvað sem átti ekki að gerast. Hvort sem það er viljandi eða ekki, þá er þetta ekki gott,“ segir Rahm.

Rahm fór fyrsta hring mótsins á pari og á eftir að hefja leik á öðrum hringnum í dag.

Mótið stendur yfir og er í beinni á Sýn Sport Viaplay alla helgina.

PGA-meistaramótið