Sátt um að klára ESB-umræðu í tæka tíð

Áframhaldandi umræða um þingsályktunartillögu utanríkisráðherra um þjóðaratkvæðagreiðslu um aðildarviðræður við Evrópusambandið er á dagskrá þingfundar sem hefst klukkan hálf tvö í dag. Þórunn Sveinbjarnardóttir, forseti Alþingis, segir umræðuna hafa gengið vel. „Hún hefur verið góð. Almenn þátttaka og góð umræða,” sagði Þórunn þegar fréttastofa sló á þráðinn í morgun.

Í þingsályktunartillögunni er lagt til að þjóðaratkvæðagreiðslan verði haldin laugardaginn 29. ágúst. Til þess að það gangi eftir þarf að ljúka umræðunni og  samþykkja tillöguna í þessari viku þar sem það þarf að gera að minnsta kosti þremur mánuðum fyrir atkvæðagreiðslu.

Þingmenn Sjálfstæðisflokks, Framsóknar og Miðflokks í utanríkismálanefnd lögðu til að atkvæðagreiðslunni yrði frestað til 17. október og bent hefur verið á að stjórnarandstaðan gæti farið í málþóf sem myndi þá leiða til þess að hverfa þyrfti frá fyrirhugaðri dagsetningu í ágúst.

Þórunn segir hins vegar ekki útlit fyrir það. Umræðan sé á áætlun. „Allt bendir til þess að við náum að ljúka henni á morgun.”

Samtöl við þingflokksformenn allra flokka gefi það til kynna.

„Mér heyrist að það séu allir á því að það sé gott að ljúka þessari umræðu í tæka tíð.”