„Bað maðurinn minn þig um að spyrja mig að þessu?“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna á alls konar tímum og það veltur á dagskrá dagsins hvenær. Oftast er ég farin á fætur frá 6:30 og dríf mig þá í ræktina, en suma daga drattast ég ekki fram úr fyrr en rétt fyrir 8.“

Hvað er það fyrsta sem þú gerir á morgnana?

„Minn dagur byrjar á hreyfingu en ég fer í ræktina tvisvar til þrisvar sinnum í viku með vinkonum mínum. Það kemur svo fyrir að ég skottast upp á Úlfarsfell með Náttúruhlaupum á þriðjudögum fyrir vinnu. 

Þessi hreyfing setur hausinn á mér í réttan gír fyrir daginn en ég er líka að reyna að sýna mér aðeins meiri mildi og hlusta á líkamann og bara sofa út ef þannig liggur á mér.“

Á skalanum 0-10, hversu handlaginn ertu heima fyrir?

Þetta er mjög góð spurning – bað maðurinn minn þig um að spyrja mig að þessu? 

Ég vil nefnilega meina að ég sé alveg hrikalega handlagin og praktísk en fæ reglulega vinsamlegar en jafnframt mjög ákveðnar ábendingar frá mínum nánustu um að ég sé ekki menntaður rafvirki, pípari eða múrari. 

Með háskólanáminu vann ég nokkra mánuði í byggingarvinnu til að safna mér pening og þar lærði ég nú ýmislegt eins og að járnabinda. Mér finnst lítið mál að henda hillu upp á vegg eða skipta um vatnslás – en ég er samt með mann í þessu núna.“

Í hvaða verkefni ertu að vinna helst í þessa dagana?

„Ég er að vinna hjá Mílu sem á og rekur víðtækt ljósleiðara-, örbylgju- og farsímanetskerfi. Við erum búin að vera í miklu umbreytingarferli og höfum fjárfest fyrir 14 milljarða síðastliðin þrjú ár til að mæta vaxandi þörfum viðskiptavina okkar og þeirri framþróun og tækniframförum sem heimurinn stendur frammi fyrir. 

Við erum á fullu núna í sumar að klára ljósleiðaravæðingu vítt og breitt um landið og þar af leiðandi að undirbúa lokun koparkerfis. Samhliða þessu erum við með mörg spennandi verkefni í gangi sem snúa að því að bæta þjónustuupplifun viðskiptavina okkar.“

Hvernig skipuleggur þú þig í vinnu?

„Ég er partur af frábæru teymi á fjármála- og rekstrarsviði Mílu þar sem samvinna er í fyrirrúmi. Skipulagið er því unnið með deildarstjórum á sviðinu og stillum við okkur saman vikulega og ræðum forgangsröðun. 

Ég lærði það hjá Marel, sem var með um 8.000 starfsmenn í 30 löndum, að samvinna og skipulag eru lykill að árangri, ánægðu starfsfólki og þar með ánægðum viðskiptavinum. 

Ég er sjálf mjög markmiðadrifin í vinnu og í þessu daglega ati finnst mér mikilvægt að við höldum fókus á réttu verkefnin sem styðja við stefnuna okkar og þau lykilmarkmið sem við höfum sett okkur hjá Mílu.“

Hvenær ferðu að sofa á kvöldin?

„Þar sem ég tek daginn snemma reyni ég að vera komin í rúmið frekar snemma um tíu. 

En svo held ég að ég sé bara eins og flestir Íslendingar; um leið og dagurinn fer að lengjast þá fyllist maður af einhverri endalausri orku og ég gæti jafnvel ákveðið að fara að reita arfa í stað þess að eyða tímanum í svefn.“