Krabba­meins­sjúkir gætu sloppið við lyfjameð­ferð

Breska ríkisútvarpið greinir frá því að vísindamenn við háskólann hafi þróað DNA-próf sem getur kannað hvort lyfjameðferð sé nauðsynleg hjá þeim sem berjast við meinið í brjósti. 

Lyfjameðferð ein og sér getur verið hættuleg og valdið þeim sem fer í gegnum hana miklum óþægindum. Hún getur valdið svima, ógleði, hárlosi, veikara ónæmiskerfi og frjósemisvandamálum. 

Tilraunir voru gerðar á fjögur þúsund manns sem höfðu nýlega greinst með krabbamein í brjósti í Bretlandi, Noregi, Svíþjóð, Ástralíu, Nýja-Sjálandi og Taílandi. Skoðuð voru fimmtíu gen tengd meininu og reynt að meta hversu líklegt væri að það kæmi aftur. 

Ákveðið var að senda þá sem litlar líkur eru á að fái aftur krabbamein, sem voru tveir þriðju af þátttakendum, ekki í lyfjameðferð. Meinið sneri ekki aftur hjá 93,7 prósent þeirra, samanborið við 94,9 prósent þeirra sem fóru í lyfjameðferð. 

Lyfjameðferð hjá þeim sem greinast með krabbamein í brjósti er oft á tíðum einungis notuð til að koma í veg fyrir að meinið taki sig upp á ný eftir skurðaðgerð.