Kane laus úr fangelsi og kemur til Ís­lands í haust

Kane var handtekinn á flugvellinum við komuna frá Íslandi til Pittsburgh, vegna þess að hann skuldaði 100.000 Bandaríkjadali í meðlagsgreiðslur, eða um 12,3 milljónir króna.

„Þetta er bara eins og við reiknuðum með. Allt komið í ferli og hann er búinn að semja um hvernig þetta verður. Hann mætir hingað í september, sprækur sem lækur,“ segir Óli Björn Björgvinsson, formaður körfuknattleiksdeildar Grindavíkur.

Kane var dæmdur árið 2023 til að greiða skuldina en hann hafði þá komist að því að hann ætti sjö ára gamlan son, eins og Óli Björn upplýsti á Vísi um síðustu helgi:

„Hann á þrjú börn þarna úti, tvö með núverandi konunni sinni og svo þennan dreng sem þetta mál snýst um. Mér skilst að hann sé 11-12 ára gamall í dag og Kane fékk ekki að vita af honum fyrr en strákurinn var orðinn sjö ára gamall, þegar mamma hans kemur og segir honum að hann eigi þennan dreng. Hann er þá dæmdur til að borga barnameðlag sjö ár aftur í tímann og þannig er þessi skuld tilkomin.

Hann hefur talað um þetta við okkur og ekkert farið í grafgötur með að hann skuldaði barnameðlag úti, og ég hélt að þetta væri bara í einhverju ferli. Að hann hefði samið um einhverjar mánaðarlegar greiðslur eða slíkt. En það er greinilega ekki þannig. Það kemur mér því jú svolítið á óvart að hann hafi hreinlega verið tekinn fastur karlgreyið þegar hann kom þarna út,“ sagði Óli Björn í viðtali við Vísi um helgina.

Hann staðfesti í dag að Kane væri laus úr fangelsi og búinn að semja um greiðslur vegna málsins. Aðspurður hvort Grindvíkingar myndu hjálpa Kane sérstaklega með skuldina svaraði Óli Björn:

„Nei, þetta er bara eitthvað sem hann semur um. Hann er allavega kominn út og málið að mér skilst í farveg sem allir eru sáttir við.“

Kane kom til liðs við Grindavík árið 2023 og hefur verið algjör lykilmaður í liðinu síðan, sem og einn allra besti leikmaður Bónus-deildarinnar. Hann er með samning við Grindvíkinga sem gildir út næstu leiktíð.