Vilja að Evrópa velji á milli lofts­lagsins og gervi­greindar­kapp­hlaupsins

Gríðarlegar fjárhæðir hafa verið fjárfestar í gagnaverum fyrir gervigreind á undanförnum misserum. Hröð uppbygging þeirra hefur valdið stóraukinni eftirspurn eftir nýjum jarðefnaeldsneytisorkuverum, ekki síst í Bandaríkjunum.

Evrópusambandið stefnir samhliða að því að draga úr losun gróðurhúsalofttegunda um meira en helming fyrir 2030 og að þrefalda getu gagnavera fyrir árið 2032.

Álfan getur hins vegar ekki reitt sig á að þróun í rafhlöðutækni, endurnýjanlegum orkugjöfum og smárra kjarnakljúfa haldi í við gervigreindaræðið ef hún ætlar að ná yfirlýstum markmiðum sínum, að sögn Lex Coors, forseta Gagnaverasambands Evrópu sem talar máli stórfyrirtækja eins og Microsoft, Google og Amazon,

Jarðefnaeldsneyti eini möguleikinn til þess að knýja gagnaverin þar til tækni til þess að leysa það af hólmi geti mætt þörfum þeirra. Geri Evrópa þá kröfu til gagnavera að þau verði knúin endurnýjanlegri orku verði álfan undir í samkeppninni.

„Það er bara einn sigurvegari í augnablikinu: Kína,“ segir Coors við evrópska blaðið Politico.

Fórni ekki markmiðum fyrir hagnað „tæknigosa“

Útlit er fyrir að hnattræn hlýnun fari út fyrir þau mörk sem ríki heims settu sér í Parísarsamkomulaginu fyrir rúmum áratug á allra næstu árum eða áratugum. Vísindamenn hafa varað við því að hlýnuninni fylgi auknar veðuröfgar, þurrkar, hitabylgjur, flóð svo eitthvað sé nefnt.

Umhverfisverndarsinnar taka því fálega í hugmyndir Coors um að knýja stórfellda uppbyggingu gagnavera í Evrópu með því að brenna enn meira af jarðefnaeldsneytinu sem er meginorsök hnattrænnar hlýnunar.

„Sú hugmynd að það ætti að fórna enn frekar hægum árangri Evrópusambandsins í loftslagsmálum til þess að brenna meira jarðefnaeldsneyti tæknigosum (e. tech bros) til hagsbóta er fráleit,“ segir talsmaður Grænfriðunga í Evrópu við Politico.

Dan Jørgensen, orkumálastjóri Evrópusambandsins, sagði nýlega að gagnaver væru aðeins velkomin í Evrópu ef þau tækju þátt í orkuskiptum, bæði með að styrkja uppbyggingu endurnýjanlegrar orkuvinnslu og með því að beisla afgangsvarma frá verunum.

Orkumálasérfræðingur Umhverfisskrifstofu Evrópu, regnhlífarsamtaka á annað hundrað evrópskra umhverfishópa, hvetur framkvæmdastjórn ESB til þess að halda fast í loftslagsstefnuna. Gagnaver verði að standast ítrustu umhverfiskröfur og þau megi ekki grafa undan orkuskiptum.

Auk gríðarlegrar orkuþarfar hafa gagnaver í Bandaríkjunum einnig mætt mótstöðu nágranna sinna sem óttast um drykkjavatnsból sín þar sem verin krefjast mikils vatns til kælingar.