Eins og James Bond: Huggu­legur, ferðast, leysir vanda­mál og drekkur martini

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég virka best í rútínu og reyni að vakna milli 6:30 og 7:00 alla virka daga. 

Ég er frekar gamaldags og vakna ekki við símann heldur er með gamaldags útvarpsvekjara sem vekur mig á réttum tíma.“

Hvað er það fyrsta sem þú gerir á morgnana?

„Á virkum dögum byrja ég alla morgna á góðum kaffibolla og rúlla í gegnum fréttir og tölvupóstinn. Ég fer í ræktina með vinkonu minni tvo til þrjá daga vikunnar. 

Fyrir nokkrum mánuðum byrjaði ég á að hugleiða á morgnana og það hefur reynst vel til þess að ná góðri jarðtengingu inn í daginn.“

Ef þú værir karakter úr frægri bíómynd, hver værir þú þá?

„Klárlega James Bond. Huggulegur og vel til hafður, ferðast mikið og leysir flest vandamál af yfirvegun með martini í hönd.“

Í hvaða verkefni ertu að vinna helst í þessa dagana?

„Ég er nýbúinn að stofna ráðgjafarfyrirtæki, Kjöl Advisory, sem á hug minn allan þessa dagana. Eftir ellefu ár í bankageiranum fannst mér tímabært að láta gamlan draum rætast og fara í sjálfstæðan rekstur. Það er áhætta fólgin í því að taka þetta stökk og treysta alfarið á sjálfan sig en á sama tíma ótrúlega spennandi.“

Hvernig skipuleggur þú þig í vinnu?

„Ég þrífst því best í góðri rútínu. Mér finnst best að halda utan um alla dagskrá, hvort sem hún er vinnutengd eða persónuleg, í sama dagatalinu. Annars er hætta á að þetta skolist allt til.“

Hvenær ferðu að sofa á kvöldin?

„Ég er frekar kvöldsvæfur og er búinn með kvöldrútínuna og kominn upp í rúm um klukkan tíu öll kvöld og sofna yfirleitt á næsta klukkutímanum nema spennandi bók eða þáttasería nái að halda mér vakandi eitthvað lengur.“