Nei-hreyfingin kvíslast í nokkrar áttir

„Áfram Ísland er vettvangur fólks sem velur íslenska framtíð á eigin forsendum í þjóðaratkvæðagreiðslunni 29. ágúst. Áfram Ísland er helgað baráttu sem drifin verður áfram af jákvæðni og bjartsýni.“

Nú gæti einhver sagt að þarna væri klofningur í Nei-hreyfingunni og að þarna fari fólk á borð við Björn Zoëga lækni, Láru Herborgu Ólafsdóttur, lögmann og sérfræðing í tæknirétti, og Ólaf Ragnar Grímsson, fyrrverandi forseta Íslands, sem öll halda erindi auk Halldórs Benjamíns Þorbergssonar hagfræðings og fundarstjóra – að þau vilji með engu móti kenna sig við Heimsýn þar sem fyrir fara Haraldur Ólafsson veðurfræðingur, Erna Bjarnadóttir hagfræðingur og Vigdís Hauksdóttir. En málið er ekki alveg svo einfalt.

Í samtali við einn þeirra sem tilheyra þessum hópi kemur fram að þetta sé ekki klofningur. En fólk getur verið á móti aðild á gerólíkum forsendum. Hins vegar vilja þeir gagnrýna harðlega framlög Þorgerðar Katrínar Gunnarsdóttur utanríkisráðherra til málefnisins, en hún útbýtti 10 milljónum til Heimssýnar og öðrum tíu til Evrópuhreyfingarinnar. Óðagotið var svo mikið.

Samkvæmt heimildum Vísis verður einkum litið til fordæma frá hópum svo sem Indefence, sem barðist hart gegn Icesave-samningunum. Á þeim forsendum þarf ekki að undrast þó Ólafur Ragnar sé þarna innanborðs.

Hvað sem því líður verður fundinum streymt og segir í tilkynningu að fólk sé hvatt til að koma saman og fylgjast með fundinum á heimilum og í byggðalögum um allt land. „Áfram Ísland er opinn vettvangur fyrir alla þá sem velja sjálfstæða framtíð Íslands. Fundurinn við Austurvöll er öllum opinn.“