Fyrsti mark­vörðurinn til að skora utan af velli í 48 ár

Það þarf að fara aftur til 14. júní 1978 til að finna mark hjá markverði í efstu deild karla sem ekki var skorað úr vítaspyrnu.

Markið var skorað í leik sem fór fram á gömlu Hallarflötinni eða á sama stað og gervigrasvöllur Þróttar er staðsettur í dag.

Jón Þorbjörnsson sem skoraði eina mark fyrri hálfleiks í 4-2 sigri Skagamanna á Víkingum í júní fyrir 48 árum með glæsilegu útsparki og boltinn þeyttist fram völlinn og í gegnum klofið á markverði Víkings, Diðriki Ólafssyni.

„Ég trúði því ekki fyrst að ég hefði skorað,” sagði Jón Þorbjörnsson við Þjóðviljann eftir leikinn. Hann fann þó til með kollega sínum hinum megin á vellinum sem fékk boltann í gegnum klofið á sér þegar hann skaust á blautum vellinum.

„Auðvitað var gaman að skora en það var neyðarlegt fyrir jafn góðan markvörð og Diðrik er að fá á sig slíkt mark,” sagði Jón.

Jón er líka eini markvörðurinn fyrir utan Aron Birki í gær til að skora mark sem kom ekki úr vítaspyrnu.

Síðastur markvarða til að skora í efstu deild var Albert Sævarsson sem skoraði úr vítaspyrnu í 2-0 sigri ÍBV á Selfossi 16. september 2010. Albert fékk tækifæri til að skora úr öðru víti þetta sumar en lét þá verja frá sér.

Þorsteinn Ólafsson var aftur á móti fyrsti markvörðurinn til að skora mark í efstu deild þegar hann skoraði úr vítaspyrnu í 2-2 jafntefli Keflvíkinga og Skagamanna 29. ágúst 1976. Þetta var kveðjuleikur Þorsteins því hann var að fara til Svíþjóðar í nám.