Þrjú til­vik til rann­sóknar: Bandero á ferðinni á hvalamiðum

Samkvæmt myndskeiði sem Paul Watson-samtökin birtu á samfélagsmiðlum hafa Hvalur 8 og Hvalur 9 nú yfirgefið Hvalfjörð og eru farnir aftur á veiðar á sjó úti eftir brælu síðustu daga. Þau segja Bandero nú vera á ferðinni í átt að hvalamiðum en skipið hefur verið á siglingu við tólf mílna landhelgi Íslands síðustu daga. Undirbúningur sé hafinn til að mæta skipum Hvals hf.

Fréttastofa hefur reynt að ná sambandi við Kristján Loftsson forstjóra Hvals síðustu daga og vikur án árangurs. Þá hafa starfsmenn Hvals ekki gefið kost á viðtali en þeir hafa fengið þau fyrirmæli að ræða ekki við fréttamiðla.

Samkvæmt heimildum fréttastofu sigldu hvalveiðibátarnir úr Hvalfirði í gær um hádegisbilið.

Samkvæmt upplýsingafulltrúa Landhelgisgæslunnar er staðan óbreytt og Bandero enn fyrir utan landhelgi. Þór, varðskip gæslunnar, er enn í grennd við Bandero og fylgist grannt með för þess. Skipið sé ekki í nálægð við hvalveiðiskipin.

Þóra J. Jónasdóttir, yfirdýralæknir Matvælastofnunar, segir í samtali við fréttastofu að rannsókn standi enn yfir á atviki þar sem hvalur háði hálftíma dauðastríð. Vonir eru bundnar við að rannsókn ljúki í næstu viku. 

Hún tekur fram að öll tilvik þar sem framkvæmd veiðanna uppfyllir ekki ákvæði reglugerðar um veiðar á langreyðum séu rannsökuð sérstaklega. Hún staðfestir að þrjú atvik séu til skoðunar. Eftirlitsmaður frá Matvælastofnun hefur verið um borð við veiðar á átta hvölum af þeim ellefu sem hafa verið veiddir hingað til.

„Það eru allavega þrjú tilfelli til sérstakrar skoðunar hvað varðar framkvæmd veiðanna.“

Leiðangur Bandero er kenndur við Aðgerð 86 sem vísar til leiðangurs Sea Sheppard-samtakanna frá árinu 1986 þar sem búnaður Hvals var eyðilagður og tveimur hvalveiðibátum var sökkt.

Rod Coronado sem tók þátt í skemmdarverkunum 1986 leiðir nú Aðgerð 86 um borð Bandero. Hann ítrekar í skriflegu svari til fréttastofu að ekki komi til greina að stefna lífi eða heilsu skipverja á hvalveiðiskipunum eða Þór í hættu. Hann telur Íslendinga skammast sín fyrir hvalveiðar og meðferð á dýrunum sem að hans mati einkennist af vanvirðingu. Hann segir stjórnvöld geta stöðvað för Bandero með því að stöðva hvalveiðar.

Rætt verður nánar við Rod Coronado, leiðangursstjóra Bandero, í kvöldfréttum Sýnar.