Steypubíllinn kominn úr ánni

Ökumaður bílsins var fluttur á Landspítala með þyrlu Landhelgisgæslunnar upp úr klukkan átta í gærkvöldi vegna ofkælingar og var talinn hafa sloppið vel. Hann hafði komið sér fyrir ofan á steypubílnum sem lá á hlið ofan í Þjórsá þegar viðbragðsaðilar komu á staðinn. 

Útkall barst vegna málsins á áttunda tímanum og var þyrlusveit Landhelgisgæslunnar komin á staðinn um átta mínútur yfir átta, að sögn upplýsingafulltrúa hennar. Lögregla og björgunarsveit tóku einnig þátt í aðgerðum og greip Landsvirkjun til ráðstafana eftir að tilkynning barst um atvikið í gær. 

„Við minnkuðum rennslið frá Sultartangalóni til að auðvelda þeim að athafna sig á meðan þeir voru að ná [bílnum] upp úr sem gekk svo greiðlega. Þeir gátu farið með gröfu þarna út í og kranabíl og dregið hann upp á bakka,“ segir Ragnhildur Sverrisdóttir hjá Landsvirkjun.

Aðgerðin hafi tekið innan við klukkutíma og steypubíllinn verið kominn á land klukkan þrjú í dag. „Þannig að þetta hefur gengið mjög vel.“ 

Vegagerðin lokaði fyrir umferð um brúnna þar sem bíllinn fór út af í gærkvöldi vegna skemmda á brúarhandriði. Gert er ráð fyrir að viðgerð taki nokkra daga og leiðin verði lokuð eitthvað fram í vikuna. Hjáleið er um Landveg (26) til að komast í Landmannalaugar eða á Sprengisandsleið.

Fréttin hefur verið uppfærð.