„Allir eru hér að skemmta sér í sátt og samlyndi“

Telma Tómasson skrifar 9. júlí 2026 16:31

Hvert metið á fætur öðru hefur fallið á kynbótabrautinni á Landsmótinu og er það mál manna að hestakostur hafi sjaldan eða aldrei verið betri. Landsmót hestamanna

Landsmót hestamanna, sem að þessu sinni er haldið á Hólum í Hjaltadal, stendur nú sem hæst. Fjöldi gesta er nálægt sex þúsund og von á fleiri áhorfendum í kvöld, sem vilja sjálfsagt ekki missa af hápunktum helgarinnar. „Mótið stendur fyllilega undir væntingum,“ segir Áskell Heiðar Ásgeirsson, framkvæmdastjóri LM 2026. „Allir eru hér að skemmta sér í sátt og samlyndi, allt er eins og það á að vera. Bara gaman.“

Skipt er nokkuð um gír í dag, fimmtudag, allri undankeppni er lokið og helgin framundan, en þá rekur hver viðburðurinn annan, úrslit í öllum flokkum og Landsmótssigurvegarar verðlaunaðir.

Kynbótasýningum lauk einnig í dag með yfirlitssýningum hæst dæmdu stóðhestanna, en hvert metið á fætur öðru hefur fallið á Landsmótinu og er það mál manna að hestakostur hafi sjaldan eða aldrei verið betri.„Við erum mjög ánægð, allt hefur farið vel fram og veðrið hefur leikið við mótsgesti. Spáin er góð fyrir helgina og við hlökkum til daganna sem framundan er,“ segir Áskell Heiðar.

Hápunktar framundan

Allir viðburðir færast frá og með deginum í dag yfir á aðalvöll svæðisins og jafnvel þótt mótið hafi staðið yfir frá því á sunnudag, þá verður formleg setning þess í kvöld. Setningarathöfnin er jafnan hátíðleg með fánareið sem fulltrúar allra hestamannafélaganna taka þátt í.

Logi Már Einarsson, menningar-, nýsköpunar- og háskólaráðherra, mun setja mótið, Magnús Barðdal, nýr sveitastjóri Skagafjarðar, mun flytja jómfrúarræðu sína og Gísli Gunnarsson vígslubiskup munu ávarpa gesti og leggja blessun sína yfir samkunduna. Þá syngur karlakórinn Heimir svo undir mun taka í Hjaltadalnum.

Hannes Sigurjónsson lýtalæknir og Inga Cristina Campos í góðum gír á Landsmóti hestamanna. Þau notuðu annan fararskjóta til að komast á milli staða að þessu sinni.Vísir/Telma

„Helgin framundan lítur vel út,“ segir Áskell Heiðar. „Veðurguðirnir eru með okkur í liði og auk allra þeirra hápunkta sem við fáum að njóta um helgina þá þéttist skemmtidagskráin, með kántrí og sveitastemningu eins og vera ber. Helgin verður toppurinn á Landsmótinu,“ segir framkvæmdastjóri LM 2026 kampakátur.

Allt gengið ljómandi vel

„Landsmótið hefur gengið ljómandi vel. Mér sýnist allir vera glaðir og að njóta,“ segir Friðrik Hreinn, varðstjóri hjá lögreglunni á Norðurlandi vestra, í samtali við Vísi.

Lögreglan á Norðurlandi vestra heldur uppi lögum og reglu.Vísir/Telma

„Helgin lítur vel út og mér sýnist veðurspáin ætla að halda. Ekkert stórvægilegt hefur komið upp á og engar tilkynningar hafa borist um uppákomur á tjaldsvæðinu. Við erum aðallega að fylgjast með fólkinu og umferðinni, en allt hefur til þessa gengið vel.

Hestaíþróttir Skagafjörður

Mest lesið

Fleiri fréttir